ፕሪሚየር ሊግ ፡ ዛሬ በተካሄዱ ጨዋታዎች አዳማ ፣ መከላከያ እና ኤሌክትሪክ ድል ቀንቷቸዋል

የኢትዮጵያ ፕሪሚር ሊግ 20ኛ ሳምንት 3 ጨዋታዎች ዛሬ ሲደረጉ አዳማ ከተማ ፣ ኤሌክትሪክ እና መከላከያ ባለድል ሆነዋል፡፡

የዋና አሰልጣኙ እና ረዳቱ ፍልሚያ

የኢትዮጵያ ብሄራዊ ቡድን አሰልጣኝ ሆነው የተሸሙት አሰልጣኝ ገብረመድህን ኃይሌ እና ረዳታቸው ተደርገው በገብረመድህን የተሸሙት አሰልጣኝ ዘላለም ሽፈራው  የሚመሯቸው መከላከያ እና ሲዳማ ቡና 09፡00 ላይ ተገናኝተው ጦሩ 1-0 በማሸነፍ ወደ ድል ተመልሷል፡፡  የተቀዛቀዘ እንቅስቃሴ በታየበት እና ጥቂት ተመልካች በታደመበት ጨዋታ የመከላከያን የድ ግብ ከመረብ ያሳረፈው ባዬ ገዛኸኝ በ44ኛው ደቂቃ ነው፡፡

ውዝግብና ሽኩቻ በበዛበት ጨዋታ አዳማ ሀዋሳን 3-0 አሸንፏል

አዳማ አበበ ቢቂላ ላይ ሀዋሳ ከተማን ያስተናገደው አዳማ ከተማ 3-0 አሸንፏል፡፡ ሚካኤል ጆርጅ የግል ብቃቱን ተጠቅሞ በ9ኛው ደቂቃ አዳማን ቀዳሚ ሲያደርግ ከእረፍት መልስ በ48ኛው ደቂቃ ሱሌማን መሃመድ ከማዕዘን አካባቢ ያሻገረው ኳስ የሀዋሳው ግብ ጠበቂ ካሪያን ቴቤጎ ስህተት ታክሎበት የአዳማ ሁለተኛ ጎል ሆና ተመዝግባለች፡፡ የማሳረጊያውን ጎል  ደግሞ 84ኛው ደቂቃ ላይ ፋሲካ አስፋው ከማእዘን የተሻገረውን ኳስ በግባሩ ገጭቶ አስቆጥሯል፡፡

ጨዋታው ከጀመረበት ሰአት ጀምሮ ስፖርታዊ ጨዋነት በጎደለው ሁኔታ ከኳስ ጋር እና ኳስ ውጪ በሚፈጠሩ የተጨዋቾች ፀብ ምክንያት  በተደጋጋሚ ጨዋታው የተቋረጠ ሲሆን አሰልጣኞችም በተደጋጋሚ ተጫዋቾችን ለማረጋጋት ሜዳ ሲገቡ ተስተውሏል፡፡ በተለይም ፋሲካ አስፋው እና ግርማ በቀለ ያሳዩት የነበረውን ያልተገባ ድርጊትን የዕለቱ ዳኛ በዝምታ ማለፋቸው ግርምትን አጭሯል፡፡

ኤሌክትሪክ ወሳኙን ጨዋታ አሸንፏል

በወራጅነት ስጋት ውስጥ የሚገኙትን ኤሌክትሪክ እና ዳሽን ቢራን ያገናኘው ወሳኝ ጨዋታ በኤሌክትሪክ አሸናፊነት ተጠናቋል፡፡ዳሽን ቢራ በ8ኛው ደቂቃ በቀድሞው የኤሌክትሪክ አምበል አስራት መገርሳ አማካኝነት ባስቆጠሩት ግብ ቢመሩም ናይጄርያዊው ፒተር ኑዋዲኬ በ39ኛው ደቂቃ ከቅጣት ምት ግብ አስቆጥሮ የመጀመርያው አጋማሽ በአቻ ውጤት ተጠናቋል፡፡

ከእረፍት መልስ በ72ኛው ደቂቃ ፍፁም ገብረማርያም ከዳሽን ቢራ ተከላካዮች በማምለጥ ኤሌክትሪክን መሪ ሲያደርግ መደበኛው 90 ደቂቃ ተጠናቆ በተጨማሪው ደቂቃ አዲ ነጋሽ ከዳሽን ተከላካዮች የነጠቀውን ኳስ በደረጄ አለሙ አናት ሰዶ የኤሌክትሪክን 3ኛ ግብ ከመረብ አሳርፏል፡፡ ውጤቱን ተከትሎ ሁለቱ ቡድኖች እኩል 22 ነጥብ በመያዝ 11ኛ እና 12ኛ ደረጃ ላይ ተቀምጠዋል፡፡

የደረጃ ሰንጠረዥ

ከፍተኛ ግብ አግቢዎች

የ20ኛ ሳምንት ጨዋታዎች ነገ ሲቀጥሉ መሪው ቅዱስ ጊዮርጊስ ከ ደደቢት 09፡00 ላይ ይጫወታሉ፡፡ 11፡30 ላይ ደግሞ ኢትዮጵያ ንግድ ባንክ ከ ድሬዳዋ ከተማ ይፋለማሉ፡፡ በ10፡00 አበበ ቢቂላ ላ ኢትዮጵያ ቡና አርባምንጭን ሲያስተናገድ ፣ ቦዲቲ ላይ ወላይታ ድቻ ሀዲያ ሆሳዕናን ያስተናግዳል፡፡