ሴቶች ፕሪሚየር ሊግ (ደቡብ-ምስራቅ ዞን) ፡ ሀዋሳ ከተማ የዞኑ ቻምፒዮን መሆኑን አረጋግጧል

ሊጠናቀቅ የአንድ ሳምንት እድሜ ብቻ የቀረው የኢትዮጵያ ሴቶች ፕሪሚየር ሊግ ደቡብ-ምስራቅ ዞን 9ኛ ሳምንት ጨዋታዎች ቅዳሜ እና እሁድ ሲካሄዱ ሀዋሳ ከተማ የዞን ቻምፒዮን መሆኑን አረጋግጧል፡፡

ሀዋሳ ላይ ተከታዩ ሲዳማ ቡናን ያስተናገደው መሪው ሀዋሳ ከተማ 3-1 አሸንፏል፡፡ የሀዋሳ ከተማን የድል ግቦች አዲስ ንጉሴ ፣ አይናለም አሳምነው እና ትብለጽ አፅብሃ ሲያሰቆጥሩ ተራማጅ ተስፋዬ የሲዳማ ቡናን ብቸኛ ግብ አስቆጥራለች፡፡ ድሉን ተከትሎ ሀዋሳ ከተማ 22 ነጥቦች በመሰብሰብ የዞኑ ቻምፒየንነትን አንድ ጨዋታ እየቀረው ማረጋገጥ ችሏል፡፡

ቅዳሜ እለት በተደረገ ሌላ ጨዋታ ድሬዳዋ ላይ ድሬዳዋ ከተማ ጥሩነሽ ዲባባ አካዳሚን አስተናገዶ ካለ ግብ 0-0 ተለያይቷል፡፡

ትላንት አዳማ ላይ በተደረገው የአዳማ ከተማ እና አርባምንጭ ከተማ ጨዋታ አዳማ ከተማ 1-0 አሸንፏል፡፡ የባለሜዳዎቹን ብቸኛ የድል ግብ በጨዋታው መገባደጃ ከመረብ ያሳረፈችው ስንታየሁ ማቲዎስ ናት፡፡