የኢትዮጵያ ፕሪምየር ሊግ የመጀመርያ ሳምንት ባሳለፍነው እሁድ እና ሰኞ መካሄዱ ይታወሳል። በነዚህ ጨዋታዎች ላይ ተመዘገቡ ቁጥራዊ መረጃዎችን ከጎሎች እና ካርዶች አንፃር እንደሚከተለው አሰናድተነዋል።
ጎሎች
– በአንደኛው ሳምንት በተከናወኑ 8 ጨዋታዎች 13 ጎሎች ሲቆጠሩ ወልዋሎ 3 ጎሎች በማስቆጠር ከፍተኛ ነው።
– ከ8 ጨዋታዎች በአምስቱ ላይ ቢያንስ አንድ ጎል ሲቆጠር ሦስት ጨዋታዎች ያለ ጎል በአቻ ውጤት ተጠናቀዋል። ከ16 ክለቦች ደግሞ ሰባቱ ብቻ ጎል አስቆጥረው ሲወጡ ዘጠኙ ያለ ጎል ጨዋታቸውን አጠናቀዋል።
– ከ13 ጎሎች መካከል አስራ አንድ ጎሎች ከክፍት ጨዋታ የተቆጠሩ ሲሆን አንደኛው በፍፁም ቅጣት ምት ቀሪው ደግሞ ከፍፁም ቅጣት ምት የተመለሰ ኳስ ጎል ሆኗል።
– ከ13 ጎሎች መካከል 12 በእግር ተመትተው የተቆጠሩ ሲሆን አንድ ብቻ (ደስታ ጊቻሞ) በግምባሩ ገጭቶ አስቆጥሯል።
– ከ13 ጎሎች መካከል አስራ ሁለቱ ሳጥን ውስጥ በሚገኝ ተጫዋች የተቆጠሩ ሲሆን አንድ ጎል (ሰመረ ሐፍታይ – ሰበታ ከተማ ላይ) ብቻ ከሳጥን ውጪ የቆጠረች ሆና ተመዝግባለች።
– በግለሰብ ደረጃ 11 ተጫዋቾች በጎል አስቆጣሪዎች ሰንጠረዥ ሲካተቱ አንድ ጎል በራስ መረብ ላይ የተቆጠረ ነው። ሰመረ ሐፍታይ ሁለት ጎል ያስቆጠረ ብቸኛውም ተጫዋች ሆኗል።
ካርዶች
– በአንደኛው ሳምንት ስምንት ጨዋታዎች በአጠቃላይ 13 ቢጫ ካርዶች ተመዘዋል።
– ከቢጫ ካርዶቹ መካከል 11 ለተጫዋቾች የተመዘዙ ሲሆኑ ሁለቱ ደግሞ በአሰልጣኞች ቡድን አባላት ላይ የተመዘዙ ናቸው። የሽረው ምክትል አሰልጣኝ መብራህቱ ፍስሀ እና የመቐለው ምክትል አሰልጣኝ ጎይቶም ኃይለ የማስጠንቀቂያ ካርዱን የተመለከቱ ናቸው።
– ፋሲል ከነማ በሦስት ተጫዋቾች በርካታ ካርድ የተመዘዘበት ክለብ ሲሆን አዳማ ከተማ፣ ወላይታ ድቻ፣ ሲዳማ ቡና፣ ቅዱስ ጊዮርጊስ እና ባህር ዳር ምንም ካርድ ያላስተናገዱ ክለቦች ሆነዋል።
– በዚህ ሳምንት ሁለት ቀይ ካርዶች ተመዘዋል። የሰበታ ከተማው አዲስ ተስፋዬ እና የድሬዳዋ ከተማው ዘሪሁን አንሼቦ በቀጥታ ቀይ ካርድ ከሜዳ የተወገዱ ተጫዋቾች ናቸው ።
© ሶከር ኢትዮጵያ
