በ21ኛ ሳምንት ሦስተኛ ቀን የሚካሄዱ ጨዋታዎችን የተመለከቱ መረጃዎች አሰናድተንላችኋል።
ምድረ ገነት ሽረ ከ ኢትዮጵያ ንግድ ባንክ
ምድረ ገነት ሽረ በዛሬው የሊግ ጨዋታ ወደ ድል ለመመለስ እና ያለበትን ደረጃ ለማሻሻል ከፍተኛ ፉክክር ይጠብቀዋል። ክለቡ ካለፉት አምስት ጨዋታዎች በአንዱ ብቻ ማሸነፉና በቅርብ ሳምንታት ጎል የማስቆጠር ውስንነት ቢታይበትም በተለይ በጨዋታዎች ላይ በሚያሳየው ተጋዳይነት እና ጥብቅ የመከላከል መዋቅር ይታወቃል። በአሁኑ ሰዓት በደረጃ ሰንጠረዡ 14ኛ ረድፍ ላይ የሚገኘው ክለቡ ካለው የነጥብ መቀራረብ አንፃር የዛሬው ጨዋታ ከወራጅ ቀጠናው ለመራቅ እና የተጫዋቾቹን ስነ-ልቦና ለመገንባት ወሳኝ ነው። ቡድኑ ካለፉት ስህተቶቹ ተምሮ በመሃል ሜዳ ላይ ያለውን የኳስ ቁጥጥር ወደ ግብ ዕድል በመቀየር ረገድ ትኩረት አድርጎ ከገባ ጠንካራውን የኢትዮጵያ ንግድ ባንክን ፈትኖ ነጥብ ይዞ ለመውጣት የሚችልበት ዕድል ሰፊ ነው።
የኢትዮጵያ ንግድ ባንክ ካለፉት አምስት የሊግ ጨዋታዎች በሁለቱ ድል ቀንቶት፣ በአንዱ አቻ ወጥቶ በሁለቱ ደግሞ ሽንፈት ያስመዘገበ ሲሆን በተለይ በቅርብ ጨዋታው ፋሲል ከነማን 3 ለ 1 በማሸነፍ በጥሩ መነቃቃት ላይ ይገኛል። በአሁኑ ወቅት በደረጃ ሰንጠረዡ 24 ነጥብ ይዞ በ10ኛ ደረጃ ላይ የሚገኘው ክለቡ በ20 ጨዋታዎች 25 ግቦችን በማስቆጠር ጠንካራ የማጥቃት መስመር እንዳለው ቢያሳይም በተመሳሳይ 25 ግቦችን በማስተናገዱ በመከላከል ረገድ ክፍተቶች ይታዩበታል። ከምድረ ገነት ሽረ ጋር በሚያደርገው የ21ኛ ሳምንት ጨዋታ ንግድ ባንክ ካለው የተሻለ የግብ ማስቆጠር ልምድና ካለፈው የድል ውጤት ያገኘውን ስነ-ልቦናዊ ብልጫ ተጠቅሞ ወደ ሰንጠረዡ አጋማሽ ለመጠጋት ከፍተኛ ፉክክር ያደርጋል ተብሎ ይጠበቃል።
ሽረ ምድረገነቶች ተካልኝ ደጀኔ እና አንተነህ ተስፋዬን በቅጣት ምክንያት አያሰልፉም። በኢትዮጵያ ንግድ ባንክ በኩል አዲስ ግደይ ፣ ካሌብ አማንክዋህ እና ዮናስ ለገሰ በጉዳት ምክንያት ከዛሬው ጨዋታ ውጪ ናቸው።
ሁለቱም ቡድኖች በታሪካቸው 3 ጊዜ ሲገናኙ በአንድ ጨዋታ የኢትዮጵያ ንግድ ባንክ ድል ሲያደርግ በተቀሩት ሁለት ጨዋታዎች አቻ ተለይልይተዋል፤ የኢትዮጵያ ንግድ ባንክ 2 ፤ ሽረ ምድረ ገነት ደግሞ 1 ግብ አስቆጥረዋል።
ኢትዮ ኤሌክትሪክ ከ ሀዲያ ሆሳዕና
ኢትዮ ኤሌክትሪክ በሊጉ ጨዋታ ሀዲያ ሆሳዕናን ሲገጥም በደረጃ ሰንጠረዡ አጋማሽ ያለውን ጥንካሬ ይዞ ለመቀጠል ብሎም ደረጃውን ከፍ ለማድረግ ድል ማድረጉ የግድ ይለዋል። ክለቡ በአሁኑ ወቅት በ20 ጨዋታዎች 28 ነጥቦችን በመሰብሰብ በ7ኛ ደረጃ ላይ የሚገኝ ሲሆን በተለይ በሊጉ ካሉ ቡድኖች ሁሉ ከሲዳማ ቡና ጋር በእኩልነት የሚጠቀስ እጅግ ጠንካራ የመከላከል ብቃት (10 ግቦች ብቻ የተቆጠሩበት) ያለው ቡድን ነው። ምንም እንኳን ካለፉት አምስት ጨዋታዎች መካከል ሦስቱን በአቻ ውጤት በማጠናቀቅ በሁለቱ ሽንፈት አስተናግዶ ከድል ጋር ከተለያየ 41 ቀናትን አስቆጥሯል። ኤሌክትሪክ ይህንኑ የመከላከል ጥንካሬውን ጠብቆ በማጥቃት ረገድ የሚታዩበትን ውስንነቶች ካሻሻለ ከዛሬው ተጋጣሚው የተሻለ ነጥብ ይዞ ለመውጣት ሰፊ ዕድል አለው።
ሀዲያ ሆሳዕና ከኢትዮጵያ ኤሌክትሪክ ጋር ለሚያደርገው የ21ኛ ሳምንት ጨዋታ የሚገባው ካለፉት አምስት ጨዋታዎች መካከል ሦስቱን በመሸነፍ በተወሰነ የውጤት መዋዥቅ ውስጥ ሆኖ ነው። በአሁኑ ወቅት በደረጃ ሰንጠረዡ በ24 ነጥብ 12ኛ ደረጃ ላይ የሚገኘው ክለቡ በ20 ጨዋታዎች 17 ግቦችን አስቆጥሮ 21 ግቦችን ያስተናገደ ሲሆን ይህም በመከላከል ረገድ የሚታዩበትን ክፍተቶች ያሳያል። ምንም እንኳን በቅርቡ ፋሲል ከነማን 1 ለ 0 በማሸነፍ ጥንካሬውን ቢያሳይም በመጨረሻው ጨዋታ በባህር ዳር ከነማ 1 ለ 0 መሸነፉ ለዛሬው ጨዋታ ጥንቃቄን ምርጫው እንዲያደርግ ያስገድደዋል። ሆሳዕና ከሊጉ ጠንካራ ተከላካይ ካለው ቡድን ጋር የሚገናኝ በመሆኑ ፈጣን የሆኑት የፊት መስመር ተጫዋቾቹ የሚፈጠሩትን ጥቂት የግብ ዕድሎችን ወደ ውጤት መቀየር ላይ ትኩረት ካደረጉ የደረጃ መሻሻል ለማሳየት መልካም አጋጣሚ ይኖራቸዋል።
ኢትዮ ኤሌክትሪክ ሄኖክ ገብረሕይወት በጉዳት የሚያጣው ብቸኛው ተጫዋች ነው።
ሁለቱ ቡድኖች ከዚ ቀደም 7 ጊዜ ተገናኝተው አንድ አንድ ጊዜ ሲሸናነፉ በተቀሩት 5 ጨዋታዎች ደግሞ አቻ ተለያይተዋል። በግንኙነቱም ቡድኖቹ እኩል አምስት አምስት ጎሎችን አስቆጥረዋል።
ባህር ዳር ከተማ ከ አርባ ምንጭ ከተማ
ባህር ዳር ከተማ ዛሬ ከአርባ ምንጭ ከተማ ጋር ለሚያደርገው የ21ኛ ሳምንት የሊግ ጨዋታ የሚቀርበው ካለፉት አምስት ጨዋታዎች ሽንፈት ሳያስተናግድ (በአራት አቻ እና በአንድ ድል) ባስመዘገበው ወጥ የሆነ የመከላከል ብቃት ተደግፎ ነው። በአሁኑ ወቅት በደረጃ ሰንጠረዡ በ27 ነጥብ 8ኛ ደረጃ ላይ የሚገኘው ክለቡ በ20 ጨዋታዎች 13 ግቦችን ብቻ በማስተናገድ በሊጉ ውጤታማ ከሆኑ የተከላካይ መስመሮች አንዱ ባለቤት መሆኑን አረጋግጧል። ምንም እንኳን የአቻ ውጤቶች መብዛት በደረጃው ሰንጠረዥ አናት ላይ ካሉ ቡድኖች ጋር ያለውን ልዩነት እንዲሰፋ ቢያደርገውም በቅርብ ጨዋታው ሀዲያ ሆሳዕናን 1 ለ 0 አሸንፎ መመለሱ ለነገው ጨዋታ የቡድኑን መነቃቃት ከፍ ያደርገዋል። የጣና ሞገዶቹ ይህንን ጥንካሬያቸውን ጠብቀው በማጥቃት ረገድ የሚታይባቸውን የግብ የማስቆጠር ውስንነት (15 ግቦች ብቻ) ማስተካከል ከቻሉ ወደ ሰንጠረዡ አጋማሽ ከፍ ለማለት ምቹ አጋጣሚ አላቸው።
አርባ ምንጭ ከተማ በደረጃ ሰንጠረዡ ግርጌ (20ኛ ደረጃ) ላይ በመሆኑ ካለበት አስቸጋሪ ሁኔታ ለመውጣት ከፍተኛ ጫና ውስጥ ሆኖ የዛሬውን ጨዋታ ያደርጋል። ክለቡ በ20 ጨዋታዎች ያስመዘገበው የአንድ ድል ብቻ ታሪክና ያስቆጠራቸው 11 ግቦች በሊጉ ዝቅተኛው የማጥቃት ብቃት ባለቤት ቢያደርገውም ካለፉት አምስት ጨዋታዎች በሦስቱ አቻ በመውጣት ውጤት ለማሻሻል ጥረት እያደረገ መሆኑን ያሳያል። በተለይ ከባህር ዳር ከነማ ጋር በነበረው የመጀመርያ ዙር ግንኙነት 1 ለ 1 አቻ መለያየቱ ለነገው ጨዋታ ተስፋ የሚሰጠው ቢሆንም በ20 ጨዋታዎች 23 ግቦችን ያስተናገደው የተከላካይ ክፍሉ የጣና ሞገዶቹን የማጥቃት መስመር ለመቋቋም ጥብቅ ጥንቃቄ ያስፈልገዋል። “አዞዎቹ” ከወራጅ ቀጠናው ለመውጣት የሚያደርጉት ትግል ዛሬ በሜዳ ላይ የሚኖራቸውን ተነሳሽነት ከፍ ሊያደርገው ይችላል።
ባህር ዳር ከተማ በቅጣትም ሆነ በጉዳት ምክንያት የሚያጣው ተጫዋች እንደሌለ ተጠቅሷል። አበበ ጥላሁንን በቅጣት በኃይሉ ተስፋየን ደግሞ በጉዳት ምክንያት አያገኝም።
ሁለቱ ቡድኖች በሊጉ 7 ጊዜ የተገናኙ ሲሆን አርባምንጭ ከተማ 4 ጊዜ ባህርዳር ከተማ ደግሞ 1 ጊዜ ድል ሲያደርጉ 2 ጨዋታዎችን አቻ ተለያይተዋል። በጨዋታዎቹ አዞዎቹ 7 የጣና ሞገዶቹ ደግሞ 4 ጎሎችን መረብ ላይ አሳርፈዋል።
ፋሲል ከነማ ከ ወልዋሎ ዓ/ዩ
በአሁኑ ወቅት በ33 ነጥብ የደረጃ ሰንጠረዡ 4ኛ ደረጃ ላይ ተቀምጠው የሚገኙት አፄዎቹ ካለፉት አምስት ጨዋታዎች ሰባት ነጥቦችን (2 ድል፣ 1 አቻ እና 2 ሽንፈት) ብቻ ማሳካታቸው የውጤት መዋዠቅ ውስጥ መሆናቸውን ያሳያል። ምንም እንኳን ቡድኑ በ20 ጨዋታዎች ያስተናገደው 11 ግቦችን ብቻ መሆኑ የሊጉን ጠንካራ የመከላከል አጥር መገንባቱን ቢያስመሰክርም በተቃራኒው ያስቆጠራቸው 15 ግቦች ግን በፊት መስመሩ ላይ የሚታየውን የውጤታማነት ድርቅ በግልጽ ያሳያሉ። ፋሲል ከነማ ካጋጠሙት ተከታታይ ሽንፈቶች አገግሞ ወደ ዋንጫው ፉክክር ለመመለስና ወደ ሰንጠረዡ አናት ለመጠጋት የዛሬው ጨዋታ አማራጭ የሌለው የድል ግዴታ ያለበት በመሆኑ ጨዋታው በከፍተኛ ጥንቃቄና ስልታዊ በሆነ የማጥቃት እንቅስቃሴ የሚመራ ይሆናል ተብሎ ይጠበቃል።
ከወራጅ ቀጠናው ለመውጣት ብርቱ ትንቅንቅ ላይ የሚገኘው ወልዋሎ ዓዲግራት በአሁኑ ወቅት በ18 ነጥብ የደረጃ ሰንጠረዡ 19ኛ ረድፍ ላይ ተቀምጧል። ቡድኑ ካለፉት አምስት ጨዋታዎች ማሰባሰብ የቻለው 5 ነጥብ ብቻ መሆኑ (1 ድል፣ 2 አቻ እና 2 ሽንፈት) የውጤታማነት ጉዞው አሁንም ወጥ እንዳልሆነ ያሳያል። በተለይም በ20 ጨዋታዎች 22 ጎሎችን ያስተናገደው የተከላካይ ክፍሉ እና 13 ግቦችን ብቻ ያስቆጠረው የፊት መስመሩ በሁለቱም የሜዳ ክፍል ላይ መሻሻሎች እንደሚገቡት ትልቅ ማሳያ ነው። ከሊጉ ጠንካራ ተፎካካሪ ፋሲል ከነማ ጋር ለሚያደርገው ጨዋታ ወልዋሎ ካለበት አስቸጋሪ ሁኔታ አንጻር በመከላከል ላይ የተመሰረተ ጥንቃቄን መርጦ ነጥብ ይዞ ለመውጣት ከፍተኛ ጥረት እንደሚያደርግ ይገመታል።
በፋሲል ከነማ በኩል ተከላካዩ ዋሳዋ ጄኦፊሪ በአምስት ቢጫ ካርዶች ምክንያት በቅጣት የማይኖር ሲሆን በወልዋሎ በኩል አማካዩ ያሬድ ከበደ በመጠነኛ ጉዳት ከዛሬው ጨዋታ ውጭ ነው።
ሁለቱ ቡድኖች በሊጉ 7 ጊዜ የተገናኙ ሲሆን ፋሲል ከነማ 5 ጊዜ ሲያሸንፍ በሁለቱ አቻ ተለያይተው ወልዋሎ ምንም አላሸነፈም።