የሲቢኢ የኢትዮጵያ ፕሪሚየር ሊግ 27ኛ ሳምንት ዛሬም ቀጥሎ ሲካሄድ ጨዋታዎቹን የተመለከቱ መረጃዎች እንደሚከተለው አሰናድተንላችኋል።
አዳማ ከተማ ከ ኢትዮ ኤሌክትሪክ
አዳማ ከተማ በአሁኑ ወቅት በከባድ ፈተና ውስጥ የሚገኝ ቡድን ሆኖ የዛሬውን ጨዋታ ያደርጋል ባለፉት አምስት ጨዋታዎች ማግኘት ከሚገባው 15 ነጥቦች መካከል ማሳካት የቻለው 1 ነጥብ ብቻ መሆኑ (አራት ሽንፈት እና አንድ አቻ) የቡድኑን ወቅታዊ መዳከም በግልጽ ያሳያል። የቡድኑ ዋነኛ ድክመት በመከላከል ረገድ የሚታይበት ክፍተት ሲሆን በተለይም ግብ ካስቆጠሩ በኋላ ውጤቱን ጠብቆ በመውጣት በኩል ከፍተኛ ችግር ይታይበታል። ሆኖም በጨዋታዎች የሚያሳዩት ፈጣን የመልሶ ማጥቃት ሽግግሮቹ ሁልጊዜም ለተጋጣሚ ስጋት ናቸው። ለክለቡ ይህ ጨዋታ ከተከታታይ አራት ሽንፈቶች አዙሪት ወጥቶ ወደ ድል ለመመለስና በደረጃ ሰንጠረዡ አጋማሽ ላይ ያለውን ስፍራ ለማሻሻል እንደ ትልቅ አጋጣሚ የሚታይ ነው ስለዚህም ከመከላከል ይልቅ ወደ ማጥቃት ያዘነበለ አጨዋወት እንደሚከተሉ ይጠበቃል።
በተቃራኒው ኢትዮ ኤሌክትሪክ በአንፃራዊነት የተረጋጋና ጠንካራ ግስጋሴ ላይ የሚገኝ ቡድን ነው ባለፉት አምስት ጨዋታዎች ሦስት ድሎችን በማስመዝገብ በደረጃ ሰንጠረዡ 6ኛ ደረጃ ላይ መቀመጥ ችሏል። የቡድኑ ጥንካሬ በተደራጀው የመከላከል መስመሩ እና በተለይም በሜዳው ላይ ካለው የተጋጣሚን የማጥቃት እንቅስቃሴ የማቋረጥ ብቃቱ የሚመነጭ ሲሆን በመስመር በኩል የሚሰነዝራቸው ጥቃቶችም ውጤታማ ናቸው። ምንም እንኳን በመጨረሻው ጨዋታው በቅዱስ ጊዮርጊስ ሽንፈት ቢያስተናግድም ቡድኑ ያለው የስነ-ልቦና ዝግጁነት እና ግቦችን የማስቆጠር አማራጩ ለአዳማ ከተማ ተከላካዮች ራስ ምታት መሆኑ አይቀርም። ለኤሌክትሪክ የዛሬው ጨዋታ ዓላማው ካለፈው ሽንፈት በቶሎ አገግሞ ወደ ድል መንገድ በመመለስ የደረጃ ሰንጠረዡን አናት መቃኘት ነው።
ሁለቱ ቡድኖች በሊጉ ዛሬ ለ41 ጊዜ ይገናኛሉ። እስካሁን 54 ግቦች ያስቆጠረው አዳማ ከተማ 21 ድሎችን ሲያሳካ 11 ጊዜ መርታት የቻለው ኤሌክትሪክ ደግሞ 47 ጎሎች አሉት።
ኢትዮጵያ ንግድ ባንክ ከ ሲዳማ ቡና
የ2016 የሊጉ ቻምፒዮን ኢትዮጵያ ንግድ ባንክ ወደ ቀድሞ ጥንካሬው ለመመለስ በሚያደርገው ጉዞ ላይ የሚገኝ ሲሆን ባለፉት አምስት ጨዋታዎች ያስመዘገበው ውጤት (3 ድል፣ 1 አቻ እና 1 ሽንፈት) ቡድኑ በጥሩ መነቃቃት ላይ እንዳለ ያሳያል። የቡድኑ ዋነኛ ጥንካሬው ግቦችን የማስቆጠር ብቃቱ ሲሆን በተለይም በቅርብ ሳምንታት ያስመዘገባቸው ድሎች የአጥቂ መስመሩ ምን ያህል ስል እንደሆነ ማሳያ ናቸው። ሆኖም አልፎ አልፎ በመከላከል ረገድ የሚታዩበት የመዘናጋት ክፍተቶች ለተጋጣሚዎች ዕድል ሊሰጡ ይችላሉ። ንግድ ባንክ ይህንን ጨዋታ የሚያሸንፍ ከሆነ በደረጃ ሰንጠረዡ አጋማሽ ላይ ያለውን ስፍራ በማጠናከር ወደ ላይኛው ፉክክር ለመጠጋት ትልቅ ዕድል ይኖረዋል።
በደረጃ ሰንጠረዡ አናት ላይ በ 48 ነጥብ እየመራ የሚገኘው ሲዳማ ቡና የሊጉን ዋንጫ ለማንሳት ባለው ግስጋሴ ላይ ይህ ጨዋታ እጅግ ወሳኝ ይሆንለታል። ቡድኑ ባለፉት አምስት ጨዋታዎች ሦስት ድሎችን ቢያስመዘግብም በመጨረሻው ጨዋታው በመቻል (3-1) መሸነፉ ለቡድኑ ትንሽ መደናገጥን ሊፈጥር ይችላል። የሲዳማ ቡና ትልቁ ጥንካሬው የተደራጀ የቡድን ስብስብ እና ጠንካራው የመከላከል መስመሩ ሲሆን በአማካይ መስመር ላይ የሚደረገው የኳስ ቁጥጥርም ለተጋጣሚዎች ፈታኝ ነው። ለሲዳማ ቡና የዛሬው ጨዋታ ካለፈው ሳምንት ሽንፈት አገግሞ የመሪነቱን ቦታ ይበልጥ ለማጠናከር የሚጠቀምበት በመሆኑ ጨዋታውን በጥንቃቄ እና በከፍተኛ የማጥቃት ጫና እንደሚጀምር ይጠበቃል።
ሁለቱ ቡድኖች በሊጉ ለ21 ጊዜያት የተገናኙ ሲሆን አመዛኙ 11 ጨዋታ በአቻ ውጤት የተጠናቀቀ ነው። ሲዳማ 6 ጨዋታ ሲያሸንፍ ንግድ ባንክ ደግሞ 4 አሸንፏል። በግንኙነታቸው ንግድ ባንክ 24፣ ሲዳማ ቡና ደግሞ 23 ግቦችን አስቆጥረዋል።
ሀዲያ ሆሳዕና ከ ኢትዮጵያ ቡና
በደረጃ ሰንጠረዡ 13ኛ ደረጃ ላይ የሚገኘው ሀዲያ ሆሳዕና ከወራጅ ቀጠናው ስጋት ራሱን ለማራቅና ወደ ሰንጠረዡ አጋማሽ ለመጠጋት ዛሬ ብርቱ ፈተና ይጠብቀዋል። የቡድኑ ዋነኛ ጥንካሬ ተጋጣሚን ግብ እንዳያገባ በጠንካራ መከላከል ላይ የተመሰረተ አጨዋወቱ ሲሆን ባለፉት ሳምንታትም እንደ አርባምንጭ ያሉ ክለቦችን በዚሁ ስልት ማሸነፍ ችሏል። ሆኖም በጨዋታዎች ላይ ግብ የማስቆጠር አቅሙ አነስተኛ መሆኑ እና የማጥቃት መስመሩ ላይ የሚታየው ድክመት ዋነኛው ስጋቱ ነው። ሀዲያ ዛሬ የሚያደርገውን ይህንን ጨዋታ ካሸነፈ በደረጃው ከፍ ለማለትና ቡድኑ ያለበትን ጫና ለመቀነስ ትልቅ መነቃቃትን ይፈጥርለታል።
በሌላ በኩል በ 36 ነጥብ 7ኛ ደረጃ ላይ የሚገኘው ኢትዮጵያ ቡና በሊጉ ካሉ ማራኪ እና ተከታታይ ውጤት እያስመዘገቡ ካሉ ቡድኖች አንዱ ሆኖ ወደዚህ ጨዋታ ይገባል። ቡድኑ ባለፉት አምስት ጨዋታዎች ያስመዘገበው ውጤት (3 ድል እና 1 አቻ) በጥሩ ወቅታዊ አቋም ላይ መሆኑን የሚያሳይ ሲሆን ትልቁ ጥንካሬውም በፍጥነት እና በብዙ ቅብብሎሽ ላይ የተመሰረተ የማጥቃት ጥበቡ ነው። ይሁን እንጂ አልፎ አልፎ በተከላካይ መስመሩ ላይ የሚታዩ ክፍተቶች ግብ እንዲያስተናግድ ሲያደርጉት ይስተዋላል። ለኢትዮጵያ ቡና የዛሬው ጨዋታ የሀዲያን ጠንካራ መከላከል ሰብሮ በመግባት አሸናፊነቱን ለማስቀጠልና በሰንጠረዡ አናት ላይ ካሉ ክለቦች ጋር ያለውን የነጥብ ልዩነት ለማጥበብ እጅግ ወሳኝ ነው።
ሁለቱም ቡድኖች በተገናኙባቸው 13 ግንኙነታቸው ነብሮቹ 5 ቡናማዎቹ ደግሞ 6 ጊዜ ሲያሸንፉ በሁለት ጨዋታዎች አቻ ተለያይተዋል። ከተቆጠሩት 22 ጎሎች ደግሞ ሀዲያ ሆሳዕና 11 ኢትዮጵያ ቡና 12 ግቦችን አስቆጥረዋል።
ወላይታ ዲቻ ከ ፋሲል ከነማ
ወላይታ ዲቻ በአሁኑ ወቅት የሊጉን ክለቦች በመፈተን ረገድ ልዩ ብቃት እያሳየ ይገኛል:: በተለይም ባለፉት ሰባት ጨዋታዎች ሽንፈትን አለማስተናገዳቸው ቡድኑ በራስ የመተማመን መንፈሱ መመለሱን ያሳያሉ። የቡድኑ ዋነኛ ጥንካሬው ተጋጣሚን በራሳቸው የሜዳ ክፍል ሄዶ የመጫን እና የግብ ዕድሎችን የመፍጠር ብቃቱ ሲሆን በጨዋታዎች እያሳዩት ያለው ወኔ ለተጋጣሚዎች ፈታኝ ነው። ይሁን እንጂ አልፎ አልፎ የሚታዩ የመከላከል ስህተቶች ዋነኛ ድክመቶቹ ናቸው። ዛሬም ይህንን የማጥቃት ጫና በመጠቀም ድል በማስመዝገብ ከደረጃ ሰንጠረዡ ግርጌ ራሱን ይበልጥ ለማራቅ እንደሚጫወት ይጠበቃል።
በሌላ በኩል ፋሲል ከነማ በሰንጠረዡ አናት ላይ ያለውን ስፍራ ለማስከበር የሚፋለም ሲሆን ባለፉት ጨዋታዎች በብዛት የሚታዩበት የአቻ ውጤቶች ግን የነጥብ ጉዞውን ገድበውታል። የቡድኑ ጥንካሬ በልምድ በበለጸገው የተከላካይና የአማካይ ክፍሉ ላይ የሚመነጭ ሲሆን ኳስን አረጋግቶ በመጫወት ረገድም በሊጉ ካሉ ጥሩ ክለቦች አንዱ ነው። ይሁን እንጂ የአጥቂ መስመሩ ግቦችን ወደ ማምረት ለመለወጥ መቸገሩ ቡድኑን ዋጋ እያስከፈለው ይገኛል። ፋሲል ዛሬ ካለፈው ሳምንት አሸናፊነቱ (ሀዋሳን 1-0 ማሸነፉ) ተነስቶ ወጥነት ያለው ውጤት ለማምጣትና ወደ መሪዎቹ ይበልጥ ለመጠጋት ጥንቃቄ የታከለበት ጨዋታ ያደርጋል ተብሎ ይታሰባል።
ሁለቱ ክለቦች እስካሁን 17 ጊዜ የተገናኙ ሲሆን ፋሲል ከነማዎች 7 ጊዜ ድል አድርገው 18 ግቦች ሲያስቆጥሩ 19 ግቦች ያሏቸው ወላይታ ድቻዎች 6 ጊዜ አሸንፈዋል፤ 4 ጊዜ ደግሞ ነጥብ ተጋርተዋል።