ሁለት ጨዋታዎች እየቀሩት የሊግ ሻምፒዮን ያሳወቀን ውድድር ዛሬስ የሊጉን የመጀመሪያ ወራጅ ቡድን ያሳውቀን ይሆን? ለዚህ ምላሽ የሚሰጠንን እና ሌሎች ጨዋታዎችን የተመለከቱ መረጃዎችን እንደሚከተለው አቅርበንላችኋል።
ወልዋሎ ዓዲግራት ዩኒቨርሲቲ ከ ሀዲያ ሆሳዕና
ይህ ጨዋታ በደረጃ ሰንጠረዡ ግርጌ ላይ ለሚገኙት እና ላለመውረድ ለሚፋለሙት ሁለቱ ክለቦች ፍጹም የህልውና ፍልሚያ ነው። ወልዋሎ ዓዲግራት ዩኒቨርሲቲ በአሁኑ ወቅት በ42 ነጥብ 16ኛ ደረጃ ላይ የሚገኝ ሲሆን ካለፉት አምስት ጨዋታዎች አራቱን አቻ በመለያየት ነጥብ የመጣል አባዜ አስመልክቶናል። በ35 ጨዋታዎች 30 ጎል አስቆጥሮ 34 ያስተናገደው ወልዋሎ ዛሬ ሶስት ነጥብ ካላገኘ ወደ መጨረሻዎቹ አራት ወራጅ ቡድኖች የመንሸራተት ከፍተኛ ስጋት አለበት። ቡድኑ በሜዳ ላይ አስገዳጅ የማጥቃት ስልትን ይዞ እንደሚገባ የሚጠበቅ ሲሆን የመሃል ሜዳ ሽግግሩን በማፍጠን እና የተጋጣሚን የኋላ ክፍል በነጻ ስፍራዎች ላይ በሚደረጉ ፈጣን የማጥቃት ሩጫዎች መስበር የሚችል ከሆነ ምናልባት የዛሬው የጨዋታ አሸናፊ የመሆን እድሉ የሰፋ ነው።
ሀዲያ ሆሳዕና በበኩሉ በ43 ነጥብ 15ኛ ደረጃ ላይ በመቀመጥ ከወልዋሎ በደረጃም ሆነ በነጥብ በአንድ እርምጃ ብቻ ከፍ ብሎ ይገኛል። ቡድኑ በቅርብ ሳምንት በፋሲል ከነማ 1 ለ 0 መሸነፉ ቡድኑ ዛሬ በሚያደርገው ጨዋታ የሚመዘገበው ውጤት በቀሪው የሊግ ጉዞው ላይ እጅግ ወሳኝ ሚና ይጫወታል። ጨዋታው ሁለቱም ክለቦች በቀጥታ ከተፎካካሪያቸው ነጥብ የሚቀሙበት በመሆኑ እንደ ስድስት ነጥብ ዋጋ የሚቆጠር እጅግ ብርቱ ፍልሚያ ነው። ዛሬ በሚደረገው የሜዳ ላይ ፉክክር ሁለቱም ወገኖች ከተጋጣሚያቸው ስህተትን በመጠበቅ ረጋ ያለ አጨዋወትን ከመምረጥ ይልቅ ከወራጅ ቀጠናው ስጋት ሙሉ በሙሉ እፎይ ለማለት እና አስገዳጁን ሶስት ነጥብ በእጃቸው ለማስገባት ከመጀመሪያው ደቂቃ ጀምሮ ብርቱ የማጥቃት ፍላጎት የታየበት ሳቢ ጨዋታን ሊያስመልከተን ይችላል።
የተሰረዘው እና በሀዲያ ሆሳዕና አንድ ለባዶ አሸናፊነት የተጠናቀቀውን የ2012 ውድድር ዓመት ጨዋታ ሳይጨምር 3 ጊዜ የተገናኙት ክለቦቹ አንድ ጊዜ ሀድያ ሲያሸንፍ ቀሪዎቹን 2 ጨዋታዎች ወልዋል ድል ማድረግ ችሏል። በጨዋታዎቹም ሀድያ 3፤ ወልዋሎ 5 ግቦችን አስቆጥረዋል።
ፋሲል ከነማ ከ አርባ ምንጭ ከተማ
የአፄዎቹ ስብስብ ፋሲል ከነማ በ49 ነጥብ 6ኛ ደረጃ ላይ የሚገኝ ሲሆን በ35 ጨዋታዎች 25 ጎል አስቆጥሮ 27 ያስተናገደ ቡድን ነው። ካለፉት አምስት ጨዋታዎች ሶስቱን ቢሸነፍም ባሳለፍነው ሳምንት ሀዲያ ሆሳዕናን 1 ለ 0 ማሸነፉ ቡድኑን ወደ አሸናፊነት ጎዳና መልሶታል። ፋሲል ከነማ በአሁኑ ሰዓት ሙሉ በሙሉ ከወራጅነት ስጋት ነጻ በመሆኑ ዛሬ በሜዳ ላይ ያለምንም ውጥረት የኳስ ቁጥጥር ብልጫን በመውሰድ እና የፊት መስመር አጥቂዎቹን በነጻነት በማንቀሳቀስ ፈጣንና ሳቢ የማጥቃት ጨዋታን ሊያስመልከተን ይችላል።
በተቃራኒው በአስገዳጅ ሁኔታ ውስጥ የሚገኘው አርባ ምንጭ ከተማ በ35 ነጥብ የደረጃ ሰንጠረዡ የመጨረሻ መስመር (20ኛ ደረጃ) ላይ ተቀምጧል። ክለቡ ካለፉት አምስት ጨዋታዎች ሁለቱን ተከታታይ ድሎች ማስመዝገቡ በሊጉ የመቆየት ተስፋውን ቢያነቃቃውም ዛሬ ከፋሲል ከነማ ጋር በሚያደርገው ጨዋታ ሽንፈት የሚያስተናግድ ከሆነ የዘንድሮው የኢትዮጵያ ፕሪሚየር ሊግ የመጀመሪያው ወራጅ ቡድን ሆኖ መመዝገቡ አይቀሬ ይሆናል። በመሆኑም አርባ ምንጭ ከተማ ካለበት የሞት ሽረት ደረጃ ለመውጣት ዛሬ በሜዳ ላይ ከፍተኛ ጉልበትና ፍላጎት የታከለበት አጨዋወት ሊያሳይ ይችላል። ቡድኑ የፋሲልን የፊት መስመር ፍጥነት ለመግታት ጥቅጥቅ ያለ መከላከልን በመጠቀም ወደ ፊት የሚላኩ ረጅም ኳሶችን እና የተጫዋቾችን የግል ጥረት መሠረት ያደረገ ድንገተኛ ጥቃት ሊሰነዝር ይችላል።
በፋሲል ከነማ በኩል ሀብታሙ ተከስተ በቅጣት እንዲሁም ዮናታን ፍስሃ በጉዳት ከዛሬው ጨዋታ ውጭ ሲሆኑ ዋሳዋ ጅኦፍሪ እና ያሬድ ብርሃኑ የመሰለፋቸው ነገር አጠራጣሪ ነው።
ሁለቱ ቡድኖች ከዚህ ቀደም በፕሪሚየር ሊጉ በ11 አጋጣሚዎች የተገናኙ ሲሆን ፋሲል 4 ጊዜ እንዲሁም አርባ ምንጭ 3 ጊዜ ሲያሸንፉ በተቀሩት አራት ጨዋታዎች ደግሞ አቻ ተለያይተዋል። በጨዋታዎቹ ዐጼዎቹ 10 አዞዎቹ ደግሞ 8 ግቦች አስቆጥረዋል።
ወላይታ ዲቻ ከ ኢትዮ ኤሌክትሪክ
ይህ ጨዋታ በደረጃ ሰንጠረዡ መካከለኛ ክፍል ላይ በሚገኙ ሁለት ክለቦች መካከል የሚደረግ ቢሆንም፣ ቡድኖቹ ካለፉበት ተቃራኒ የውጤት መስመር አንጻር በሜዳ ላይ ብርቱ የታክቲክ ፍልሚያ እንደሚታይበት ይጠበቃል። ወላይታ ዲቻ በአሁኑ ወቅት በ47 ነጥብ 7ኛ ደረጃ ላይ ይገኛል። ቡድኑ የወቅቱ ዋና አሰልጣኝ መሳይ ተፈሪን በኃላፊነት ሲቀጥር በደረጃ ሰንጠረዡ ግርጌ ላይ ተቀምጦ የነበረና በከፍተኛ የመውረድ ስጋት ውስጥ የሚገኝ ስብስብ ነበር። ክለቡ ባደረጋቸው ባለፉት ባለፉት 22 ጨዋታዎች ሁለት ጊዜ ብቻ ሽንፈትን በማስተናገድ አስደናቂ ጥንካሬን ያሳየ ሲሆን አሁን ላይ ከስጋት ሙሉ በሙሉ ወጥቶ ወደ መሪዎቹ ተከታይ ለመጠጋት ጥረቶችን እያደረገ ይገኛል። ዲቻዎች ይህንን አስገራሚ ጥንካሬያቸውን እና የተደራጀ የቡድን መከላከል ስልታቸውን ዛሬም በሜዳ ላይ በመድገም የአሸናፊነት ጉዞአቸውን ለማስቀጠል ይጫወታሉ ተብሎ ይጠበቃል።
የዛሬው ተጋጣሚያቸው ኢትዮ ኤሌክትሪክ በተመሳሳይ በ47 ነጥብ 8ኛ ደረጃ ላይ የሚገኝ ሲሆን ከዲቻ የሚለየው በጎል ክፍያ ብቻ ዝቅ ማለቱ ነው። ኤሌክትሪክ በውድድር ዓመቱ መጀመሪያ አካባቢ ባሳየው እጅግ ጠንካራ አፈጻጸም ለዋንጫ ቀዳሚ ግምት ከተሰጣቸው ክለቦች አንዱ የነበረ ቢሆንም የጨዋታ ሳምንታት እየጨመሩ በመጡ ቁጥር ግን ቡድኑ ቀስ በቀስ የመንሸራተት ታሪክ አስተናግዶ አሁን ላይ በደረጃ ሰንጠረዡ አጋማሽ ላይ ለመገኘት ተገዷል። ክለቡ ካለፉት አምስት ጨዋታዎች 1 ድል፣ 2 አቻ እና 2 ሽንፈት በማስተናገድ በተለዋዋጭ አቋም ላይ የሚገኝ ቢሆንም በ35 ጨዋታዎች 24 ጎል ብቻ ያስተናገደ ጠንካራ የኋላ ክፍል አለው። ሁለቱም ክለቦች ከደረጃ ጫና ነጻ መሆናቸው ጨዋታው በመሃል ሜዳ ላይ በሚደረግ የቴክኒክ ብልጫ፣ የተጫዋቾችን የግል ክህሎት በነጻነት በማሳየት እና ክፍት የሆኑ የግብ ማግባት አጋጣሚዎችን በመፍጠር ረገድ እጅግ ሳቢ እና ማራኪ ጨዋታን ሊያስመልከተን ይችላል።
ቡድኖቹ ከዚህ ቀደም 15 ጊዜ ተገናኝተዋል፤ ኢትዮ ኤሌክትሪክ 4 ጊዜ ሲያሸነፍ ድቻ 3 ጨዋታዎች አሸንፏል። በ 8 አጋጣሚዎች ደግሞ አቻ ተለያይተዋል። ሁለቱም ቡድኖች በተመሳሳይ 11 11 ግቦች አስቆጥረዋል።