የሲቢኢ የኢትዮጵያ ፕሪሚየር ሊግ የ26ኛ ሳምንት የሁለተኛ ቀን ጨዋታዎችን የተመለከቱ መረጃዎች
ነገሌ አርሲ ከ ኢትዮጵያ መድን
በኢትዮጵያ ፕሪሚየር ሊግ የ26ኛ ሳምንት መርሃ-ግብር ነገሌ አርሲ በደረጃ ሰንጠረዡ አናት ላይ ለመቆየት የሚያደርገውን ወሳኝ ትንቅንቅ በሜዳው ከኢትዮጵያ መድን ጋር ያደርጋል። በአሁኑ ወቅት በ41 ነጥብ 3ኛ ደረጃ ላይ የሚገኘው ነገሌ አርሲ፣ ካለፉት አምስት ጨዋታዎች በሁለቱ ነጥብ በመጣሉ (2 አቻ እና 2 ሽንፈት) የነበረውን መሪነት አሳልፎ ሰጥቷል። ሆኖም በመጨረሻው ሳምንት በአዳማ ላይ ባለቀ ሰዓት ያስመዘገበው የ2 ለ 1 ድል ወደ ቀድሞ ግርማው ለመመለስ ያለውን ተነሳሽነት ያሳየበት ነው። የቡድኑ ዋነኛ ጥንካሬ በሊጉ ካሉ አነስተኛ ግቦች (17) ካስተናገዱ የተከላካይ ክፍሎች አንዱ መሆኑ ቢሆንም፣ በአንጻሩ የማጥቃት መስመሩ ካለፉት አምስት ጨዋታዎች በሦስቱ ግብ ማስቆጠር አለመቻሉ የዛሬውን ጨዋታ ለማሸነፍ የሚፈታተነው ደካማ ጎኑ ነው። ነገሌ ይህንን የፊት መስመር ድርቀት ቀርፎ የቤት ስራውን በአግባቡ ከተወጣ፣ በሁለተኛ ደረጃ ላይ ካለው ሀዋሳ ጋር ያለውን የነጥብ እኩልነት በመጠቀም የደረጃ መሻሻል ለማሳየት ሰፊ ዕድል አለው።
ኢትዮጵያ መድን በበኩሉ በ28 ነጥብ 17ኛ ደረጃ ላይ ተቀምጦ ከወራጅ ቀጠናው ለመውጣት በሚያደርገው ብርቱ ፍልሚያ ወደ ነገሌ አምርቷል። መድን ካለፉት አምስት ጨዋታዎች ሦስቱን በአቻ ውጤት በማጠናቀቁና በመጨረሻው ጨዋታ በቡና 1 ለ 0 በመሸነፉ በስነ-ልቦና ረገድ ጫና ውስጥ ቢሆንም፣ የግብ ልዩነቱ 0 መሆኑ (19 አስቆጥሮ 19 ያስተናገደ) ቡድኑ ሜዳ ላይ ያለውን የታክቲክ ዲሲፕሊን እና በቀላሉ የማይበገር መሆኑን ያሳያል። የቡድኑ ትልቁ ድክመት የጨዋታ የበላይነትን ወደ ድል የመቀየር አቅሙ ዝቅተኛ መሆኑና በተከታታይ ጨዋታዎች ነጥብ የመጣል አባዜው ነው። መድን ዛሬ ካለው የደረጃ ዝቅጠት አንጻር በነገሌ አርሲ በኩል የሚሰነዘርበትን የማጥቃት ጫና ተቋቁሞ በመልሶ ማጥቃት ግብ ማግኘት ካልቻለ፣ የሊጉ ቆይታው አጣብቂኝ ውስጥ መግባቱ የማይቀር ይሆናል።
በነጌሌ አርሲ በኩል ዘሩባቤል ፈለቀ በቅጣት ምክንያት አይኖርም። በኢትዮጵያ መድን በኩል ዋንጫ ቱት በጉዳት እንዲሁም አለን ካይዋ በአምስት ቢጫ ካርዶች ከዛሬው ጨዋታ ውጭ ናቸው።
ሁለቱ ቡድኖች በፕሪሚየር ሊጉ አንድ ጊዜ የተገናኙ ሲሆን ነገሌ አርሲ 1-0 በሆነ ውጤት ማሸነፍ ችሏል።
ፋሲል ከነማ ከ ሀዋሳ ከተማ
የሊጉ የቀድሞ ግርማ ሞገሳቸው የራቃቸው አፄዎቹ ለመጨረሻ ጊዜ ድል ካደረጉ የስምንት ጨዋታዎች እና የ63 ቀናት ረጅም ጉዞ በኋላ ዛሬ የነጥብ ድርቅን ለመስበር ይፋለማሉ። ፋሲል ከነማ በአሁኑ ወቅት በ36 ነጥብ 6ኛ ደረጃ ላይ ቢገኝም ባለፉት ስምንት ጨዋታዎች አራቱን ተሸንፎ አራቱን በአቻ ውጤት ማጠናቀቁ በውጤት ረገድ መረጋጋት እንዳጣ ያሳያል። በተለይም በ25 ጨዋታዎች ያስቆጠራቸው 17 ግቦች ብቻ መሆናቸው የአጥቂ ክፍሉን ደካማነት የሚያጋልጥ ቢሆንም በሊጉ ጥቂት ግቦች የተቆጠሩበት የኋላ ክፍሉ ግን ለዛሬው ተጋጣሚው በቀላሉ የማይበገር ምሽግ እንደሚሆን ይጠበቃል።
በሊጉ የደረጃ ሰንጠረዥ በ41 ነጥብ 2ኛ ደረጃ ላይ የሚገኘው ሀዋሳ ከተማ ባለፈው ሳምንት ሙሉ በሙሉ በእጁ ገብቶ የነበረውን ድል በመጨረሻ ደቂቃዎች ላይ የጣለበትን አጋጣሚ ለመርሳት ዛሬ ወደ ሜዳ ይገባል። ቡድኑ ካለፉት አምስት ጨዋታዎች ሁለቱን ተሸንፎ በሁለቱ አቻ ወጥቶ በአንዱ ብቻ ያሸነፈ ሲሆን በ25 ጨዋታዎች 30 ግቦችን ያስቆጠረው አስፈሪ የማጥቃት መስመሩ ዋነኛ ጥንካሬው ነው። ይሁን እንጂ መሪ ሆኖ በሚወጣባቸው ጨዋታዎች ማጠቃለያ ላይ የታይበት የትኩረት ማጣትና መዘናጋት እንደ ትልቅ ድክመት የሚጠቀስ በመሆኑ ዛሬ ያንን ውጤታማ የማጥቃት ብቃቱን ከኋላ ክፍሉ ንቃት ጋር አቀናጅቶ ካልቀረበ ወደ ዋንጫው መሪነት የሚያደርገው ጉዞ ዳግም ፈተና ሊገጥመው ይችላል።
ፋሲል ከነማ በዛሬው ጨዋታ ብሩክ አማኑኤልን በአምስት ቢጫ ካርድ ቅጣት እንዲሁም አምሳሉ ጥላሁንን በጉዳት የማያገኝ ሲሆን ጉዳት ላይ የነበረው ሀብታሙ ተከስተ ለዛሬው ጨዋታ ዝግጁ ነው። ሀዋሳ ከተማ ወጣቱን የመስመር ተመላላሽ ተከላካይ ብሩክ ታደለን በአምስት ቢጫ ካርድ ቅጣት ምክንያት ለዛሬው ጨዋታ አያሰለፍም።
ሁለቱ ቡድኖቹ ከዚህ ቀደም በ18 ጨዋታዎች ተገናኝተዋል። ዐፄዎቹ በ6 ጨዋታዎች ድል በማድረግ ቀዳሚ ሲሆኑ ሐይቆቹ 4 ጊዜ አሸንፈዋል፤ ቀሪዎቹ 8 ጨዋታዎች ደግሞ በአቻ ውጤት ተጠናቀዋል በጨዋታዎቹ ሁለቱም ቡድኖች እኩል 21 ግቦችን ማስቆጠር ችለዋል።
አርባምንጭ ከተማ ከ ሀዲያ ሆሳዕና
በሊጉ ግርጌ በ22 ነጥብ 20ኛ ደረጃ ላይ የሚገኘው አርባምንጭ ከተማ ዛሬ ከሀዲያ ሆሳዕና ጋር በሚያደርገው ጨዋታ ካለበት አጣብቂኝ ለመውጣት ይፋለማል። አዞዎቹ ካለፉት አምስት ጨዋታዎች በሦስቱ ድል የቀናቸው ሲሆን በመጨረሻው ሳምንት በሸገር ከተማ ላይ ያስመዘገቡት የ2 ለ 1 ስኬት ቡድኑ በአሁኑ ወቅት ያለበትን አስደናቂ የወኔ መነቃቃት በግልጽ ያሳያል። የቡድኑ ዋነኛ ጥንካሬ ተጋጣሚን ተጭኖ በመጫወት ረገድ እያሳየ የመጣው ድፍረት ቢሆንም በተከታታይ ጨዋታዎች ግቦችን የሚያስተናግደውና በቀላሉ የሚሰበረው የኋላ ክፍሉ ግን አሁንም እንደ ዋነኛ ደካማ ጎን የሚጠቀስ ነው። አርባምንጭ ዛሬ ይህንን ወቅታዊ መነቃቃቱን ተጠቅሞ ድል ካላደረገ ከወራጅ ቀጠናው ለመራቅ የሚያደርገው ጉዞ ዳግም ፈተና ሊገጥመው ይችላል።
ሀዲያ ሆሳዕና በበኩሉ በ29 ነጥብ 14ኛ ደረጃ ላይ ተቀምጦ ባለፉት ሁለት ተከታታይ ጨዋታዎች የደረሰበትን ሽንፈት ለመቀልበስ ወደ ሜዳ ይገባል። የነብሮቹ ዋነኛ ጥንካሬ በመስመር በኩል የሚሰነዘሩ ፈጣን ጥቃቶችን ለማድረስ ፈጣን የሆኑ የመስመር ተጫዋቾቻቸው ናቸው። ይሁን እንጂ የቡድኑ ትልቁ ድክመት በሜዳው መሃል ላይ የሚታይበት የፈጠራ ችግር እና የፊት መስመሩ የተፈጠሩ የግብ ዕድሎችን ወደ ውጤት የመቀየር አቅሙ ዝቅተኛ መሆኑ ነው። ሀዲያዎች ዛሬ በጥሩ መነቃቃት ላይ የሚገኘውን አርባምንጭን ለመቋቋም ያንን ፈጣን የመስመር ጥቃቱን ከተከላካይ ክፍሉ ንቃት ጋር ካላቀናጀ፣ በደረጃ ሰንጠረዡ ከፍ ለማለት ያለው ተስፋ የህልም እራት ሆኖ ይቀራል።
ቡድኖቹ በሊጉ ከተገናኙባቸው ዘጠኝ ጨዋታዎች ስድስቱ በአቻ ውጤት ሲጠናቀቁ አርባምንጭ ሁለት ሀዲያ ደግሞ አንድ ጊዜ ድል አድርገዋል። በጨዋታዎቹ ሁለቱም ቡድኖች በተመሳሳይ 11 ግቦችን አስቆጥረዋል።
ወልዋሎ ዓዲግራት ከ ወላይታ ድቻ
በደረጃ ሰንጠረዡ 15ኛ ደረጃ ላይ የሚገኘው ወልዋሎ አዲግራት ባለፈው ሳምንት ከሀዋሳ ጋር ከመመራት ተነስቶ በእጁ አስገብቶት የነበረውን ድል በጨዋታው ማጠናቀቂያ ላይ በግብ ጠባቂ ስህተት ግብ ተቆጥሮበት በአቻ ውጤት ለመጨረስ መገደዱ የፈጠረውን ቁጭት ለመወጣት ዛሬ ወደ ሜዳ ይገባል። የቢጫ ለባሾቹ ዋነኛ ጥንካሬ በቅርብ ጨዋታዎች እያሳዩ የመጡት የማጥቃት ወኔና ከኋላ ተነስቶ ውጤትን የመቀየር ብቃታቸው ቢሆንም በተቃራኒው በሊጉ 25 ግቦችን ያስተናገደው የኋላ ክፍላቸው አሁንም እንደ ትልቅ ተጋላጭነት የሚጠቀስ ነው። ወልዋሎ ዛሬ ይህንን የስነ-ልቦና ጫና ሰብሮ በጥሩ መነቃቃት ላይ የሚገኘውን ድቻን ማሸነፍ ካልቻለ ካለበት የወራጅ ቀጠና ስጋት ርቆ ራሱን ለማረጋጋት ይቸገራል።
በ28 ነጥብ 16ኛ ደረጃ ላይ የሚገኘው ወላይታ ድቻ በበኩሉ ባደረጋቸው ያለፉት 11 ጨዋታዎች ውስጥ አንድ ጊዜ ብቻ የተሸነፈ ሲሆን በተለይም ባለፉት ስድስት ተከታታይ ጨዋታዎች ሽንፈት ሳያስተናግድ በመጓዝ አስደናቂ የሚባል ወቅታዊ መነቃቃት ላይ ይገኛል። የጦና ንቦቹ ዋነኛ ጥንካሬ በሜዳ ላይ ያላቸው ጥብቅ የታክቲክ ዲሲፕሊንና ተጋጣሚን ጫና ውስጥ በመክተት የመጫወቻ መንገዶችን የመዝጋት ብቃታቸው ሲሆን ይህ የአጨዋወት ዘይቤም በራስ መተማመናቸው ከፍ እንዲል አድርጎታል። ይሁን እንጂ የቡድኑ ዋነኛ ድክመት ያንን የአጨዋወት ዘይቤ ወደ ግብ ዕድል በመቀየር ረገድ የሚታይበት የፈጠራ ውስንነት እና ተከታታይ አቻ ውጤቶችን ወደ ድል ለመለወጥ የሚቸገርበት የፊት መስመር ስልነት ነው። ድቻ ዛሬ ይህንን ሽንፈት አልባ ጉዞውን ይዞ ወደ ድል ለመመለስና ወደ ሰንጠረዡ አጋማሽ ከፍ ለማለት ከአጥቂዎቹ የላቀ ብቃትን ይሻል።
ወልዋሎዎች በዛሬው ጨዋታ ሱልጣን በርኸ እና ናሆም ኃ/ማርያም በጉዳት ምክንያት አያሰልፉም፤ በቅጣት በመጨረሻው ጨዋታ ያልተሳተፉት ስምዖን ማሩ እና ግብ ጠባቂው ሙታክብዋ ጆኤል ግን ለዛሬው ጨዋታ ዝግጁ ሆነዋል።
ሁለቱ ቡድኖች በሊጉ እስካሁን 7 ጊዜ የተገናኙ ሲሆን ወላይታ 3 ጊዜ ሲያሸንፍ 4 ጊዜ ደግሞ አቻ ተለያይተዋል። በግንኙነታቸውም ወላይታ ድቻ 8 ወልዋሎ ዓ/ዩ 4 ጎሎችን አስቆጥረዋል።