የ8ኛው ሳምንት የሲቢኢ የኢትዮጵያ ፕሪምየር ሊግ የመጀመርያ ቀን ጨዋታዎች የተመለከቱ መረጃዎች !
ፋሲል ከነማ ከ ወላይታ ድቻ
አራት ድሎች እና ሦስት የአቻ ውጤቶች አስመዝግቦ በ 15 ነጥቦች 2ኛ ደረጃ ላይ የተቀመጠው ፋሲል ከነማ በሊጉ ብቸኛው ሽንፈት ያልቀመሰ ቡድን ነው።
በሁለት ተከታታይ ጨዋታዎች ነጥብ ከተጋሩ በኋላ በ7ኛው ሳምንት ሀዋሳ ከተማን ማሸነፍ የቻሉት ዐፄዎቹ እስካሁን ድረስ በክፍት የጨዋታ እንቅስቃሴ ግብ አላስተናገዱም፤ ሆኖም በመጨረሻው ጨዋታ
ባልተለመደ መልኩ ተጋላጭ የነበረው የተከላካይ ክፍል ማስተካከል ወደ ቀድሞ ጠንካራነቱ የመመለስ ስራ ይጠብቃቸዋል።
በአዲሱ አሰልጣኛቸው መሳይ ተፈሪ እየተመሩ የመጀመርያ ጨዋታቸውን የሚያከናውኑት ወላይታ ድቻዎች በሊጉ አንድ ድል፣ ሁለት አቻ እና አራት ሽንፈቶች በማስመዝገብ አምስት ነጥቦች ሰብስበው በ17ኛ ደረጃ ላይ ተቀምጠዋል። በአምስት ጨዋታዎች አንድ ነጥብ ብቻ በመሰብሰብ ደካማ አጀማመር ያደረጉት የጦና ንቦቹ ከመጨረሻዎቹ ሁለት ጨዋታዎች አራት ነጥቦችን በመሰብሰብ ቀና ብለዋል፤ ሆኖም በ7ኛው ሳምንት ወልዋሎ ላይ ያስመዘገቡት ድል ለማስቀጠል በሊጉ 10 ግቦችን ያስተናገደውን የኋላ ክፍላቸው ማሻሻል ግድ ይላቸዋል።
በፋሲል ከነማዎች በኩል በመጨረሻው ጨዋታ ጉዳት ያስተናገደው ናትናኤል ገብረጊዮርጊስ እንዲሁም ኪሩቤል ዳኜ እና ዓብዱልዓዚዝ አማን ከዛሬው ጨዋታ ውጭ ናቸው። በወላይታ ድቻዎች በኩል ደግሞ ብሩክ ኤልያስ፣ አስናቀ አምታታው
እና በፍቃዱ ህዝቅኤል በጉዳት አያሰልፉም፤
ሁለቱ ክለቦች እስካሁን 16 ጊዜ የተገናኙ ሲሆን ፋሲል ከነማዎች 7 ጊዜ ድል አድርገው 17 ግቦች ሲያስቆጥሩ 18 ግቦች ያሏቸው ወላይታ ድቻዎች 6 ጊዜ አሸንፈዋል፤ 3 ጊዜ ደግሞ ነጥብ ተጋርተዋል።
ባህርዳር ከተማ ከ ኢትዮጵያ መድን
በአራት ጨዋታዎች በእኩሌታ ሁለት ድልና ሁለት ሽንፈት በተቀሩት ሦስት ደግሞ ነጥብ ተጋርተው በዘጠኝ ነጥቦች 9ኛ ደረጃ ላይ የተቀመጡት ባህርዳር ከተማዎች በአዳማ ከተማ ከደረሰባቸው ሽንፈት ለማገገም ወደ ዛሬው ጨዋታው ይቀርባሉ።
በመጀመርያው ሳምንት ሀድያ ሆሳዕናን ካሸነፉ በኋላ ባደረጓቸው 4 ጨዋታዎች ማግኘት ከሚገባቸው 12 ነጥቦች 3 ብቻ ያሳኩት የጣና ሞገዶቹ በ6ኛው ሳምንት ጠንካራው ኢትዮ ኤሌክትሪክን ማሸነፍ መቻላቸው እንደ አወንታ የሚነሳላቸው ነጥብ ቢሆንም ወጥነት የጎደለው አካሄዳቸውን ማረም ይኖርባቸዋል።
ሁለት ሁለት ድል፣ ሽንፈት እና የአቻ ውጤት በማስመዝገብ ከ6 ጨዋታዎች 8 ነጥቦች ሰብስበው 13ኛ ደረጃ ላይ የተቀመጡት ኢትዮጵያ መድኖች እንደ ተጋጣሚያቸው ሁሉ ከሽንፈት ለማገገም ወደ ፍልምያው ይቀርባሉ። በአዲስ አበባ በተደረጉ ጨዋታዎች ሽንፈት ያልቀመሱት እና ወደ ውቢቷ ሀዋሳ ካመሩ በኋላ ባደረጓቸው ሦስት ጨዋታዎች ሁለት ሽንፈቶች ያስመዘገቡት መድኖች በተጠባቂው ጨዋታ ድል ለማስመስዝገብ በብዙ ረገድ መሻሻል ይኖርባቸዋል። ባለፉት 5 ጨዋታዎች 5 ግቦች ብያስቆጥርም የወጥነት ችግር የሚስተዋበት የፊት መስመር ማሻሻልም የቡድኑ የቤት ስራ ነው።
ቡድኖቹ በሊጉ 6 ጊዜ የተገናኙ ሲሆን ሁለቱም ቡድኖች በእኩሌታ ሁለት ሁለት ጨዋታዎች ላይ ድል አድርገው በሁለት ጨዋታዎች ነጥብ ተጋርተዋል። 18 ግቦች በተቆጠሩበት የሁለቱም ግንኙነት መድን 9 ባህርዳር ደግሞ በተመሳሳይ 9 ግቦች አስቆጥረዋል።
ወልዋሎ ዓ.ዩ ከ መቐለ 70 እንደርታ
በሰባት ጨዋታዎች ስድስት ሽንፈቶች እና አንድ የአቻ ውጤት በማስመዝገብ ደካማ አጀማመር ያደረጉት ወልዋሎዎች የውድድር ዓመቱ የመጀመርያ ድል ማግኘትን እያለሙ ወደ ሜዳ ይገባሉ። በውድድር ዓመቱ ጥቂት ግብ በማስቆጠር እንዲሁም በርከት ያሉ ግቦች በማስተናገድ ቀዳሚ የሆኑት ቢጫዎች በዛሬው ጨዋታ ለተጠቀሱት ችግሮችን መፍትሔ ማበጀት ቀዳሚ ስራቸው መሆን ይገባዋል።
ከቀናት በፊት ያልተገባ ተጫዋች ማሰለፋቸውን ተከትሎ የነጥብ ቅነሳ የተደረባቸው መቐለ 70 እንደርታዎች በሊጉ ሦስት ነጥቦች ሰብስበው የዛሬው ተጋጠሚያቸውን በአንድ ደረጃ በመብለጥ 19ኛ ደረጃ ላይ ተቀምጠዋል። ምዓም አናብስት ብዙ አወንታዊ ጎን ያለው የፊት መስመር ጥንካሬ ቢኖራቸውም ለጥቃት የተጋለጠው የኋላ ክፍላቸው ዋነኛው ደካማ ጎናቸው ነው፤ በዛሬው ጨዋታም ከባድ ፈተና ይጠብቃቸዋል ተብሎ ባይገመትም ለወትሮ የተከላካይ ክፍላቸውን ማሻሻል ይኖርባቸዋል።
ሁለቱ ቡድኖች በፕሪሚየር ሊጉ 6 ጊዜ ተገናኝተው 2 ጊዜ አቻ ሲለያዩ መቐለ 3፣ ወልዋሎ 1 ጊዜ ድል አስመዝግበዋል። ምዓም አናብስት 6፣ ቢጫዎቹ ደግሞ 3 ጎል አስቆጥረዋል። (በመቐለ 70 እንደርታ አንድ ለባዶ አሸናፊነት የተጠናቀቀው የ2012 ውድድር ዓመት ጨዋታ አልተካተተም)።
ወልዋሎዎች ኢብራሂም አሕመድን በጉዳት ምክንያት አያሰልፉም፤ መቐለ 70 እንደርታዎች ደግሞ አሰጋኸኝ ጴጥሮስ በቅጣት አብርሀም ጌታቸው ደግሞ በጉዳት ምክንያት አያሰልፉም።
ኢትዮ ኤሌክትሪክ ከ አዳማ ከተማ
በሊጉ ክስተት ከሆኑ ክለቦች አንዱ የሆነው ኢትዮ ኤሌክትሪክ አራት ድል፣ ሁለት አቻ እና አንድ ሽንፈት በማስመዝገብ አስራ አራት ነጥቦችን ሰብስቦ በ3ኛ ደረጃ ላይ ተቀምጧል። በሁለት ተከታታይ ጨዋታ የአቻ እና ሽንፈት ውጤቶች ካስመዘገበ በኋላ በመጨረሻው ሳምንት ቅዱስ ጊዮርጊስ በማሸነፍ ወደ ድል መንገድ የተመለሰው ክለቡ በተፎካካሪነቱ ለመቀጠል ባለፉት ሦስት ጨዋታዎች ላይ አንድ ግብ ብቻ ያስቆጠረውን የማጥቃት ክፍሉን ማሻሻል ይኖርበታል።
ሦስት ድል፣ ሦስት አቻ እና አንድ ሽንፈት በማስመዝገብ በአስራ ሁለት ነጥቦች 7ኛ ደረጃ ላይ የተቀመጠው አዳማ ከተማ ደረጃውን ለማሻሻል ኢትዮ ኤሌክትሪክን ይገጥማል። በነገሌ አርሲ የውድድር ዓመቱ የመጀመርያ ሽንፈቱን የቀመሰው አዳማ ከተማ ባህርዳር ከተማን በማሸነፍ ወደ ድል መንገድ ከመመለሱም በተጨማሪ ጠንካራ ፉክክር በተደረገበት ጨዋታ ያሳየው ብቃት በአወንታዊነቱ ይነሳለታል። በዛሬው ጨዋታም ካከናወናቸው ሰባት ጨዋታዎች በስድስቱ መረቡን አስከብሮ የወጣውን የተከላካይ ክፍል ጥንካሬ ማስቀጠል እንዲሁም እስካሁን ድረስ በጨዋታ ከአንድ ግብ በላይ ማስቆጠር ያልቻለውን የፊት መስመር ማጠናከር ግድ ይለዋል።
በአዳማ ከተማ በኩል የመሰለፉ ነገር አጠራጣሪ ከሆነው አሕመድ ሑሴን ውጭ የተቀሩት ተጫዋቾች ለጨዋታው ዝግጁ ናቸው። ኢትዮ ኤሌክትሪኮች ግን ከቅጣትም ሆነ ከጉዳት ነፃ ሆነው ለዛሬው ጨዋታ ይቀርባሉ።
ሁለቱ ቡድኖች በሊጉ ዛሬ ለ40 ጊዜ ይገናኛሉ። እስካሁን 54 ግቦች ያስቆጠረው አዳማ ከተማ 21 ድሎችን ሲያሳካ 11 ጊዜ መርታት የቻለው ኤሌክትሪክ ደግሞ 47 ጎሎች አሉት።
