ሶስት ቀይ ካርዶችን ባስመለከቱን ጨዋታዎች ዐፄዎቹ እና የጦና ንቦች ነጥብ ሲጋሩ ቢጫ ለባሾቹ ከስምንት ሳምንታት ቆይታ በኋላ ከድል ጋር ታርቀዋል።
ፋሲል ከነማ ከ ወላይታ ድቻ

የስምንተኛ ሳምንት መክፈቻ በነበረው ጨዋታ ፋሲል ከነማ እና ወላይታ ድቻን አገናኝቷል። በሁለቱም ደጋፊዎች ህብረ ዜማ ታግዞ በተጀመረው ጨዋታ ገና በ23ኛው ደቂቃ የፋሲል ከነማው ተጫዋች ቃልኪዳን ዘላለም በሰራው ጥፋት በቀጥታ በቀይ ካርድ ከሜዳ ተሰናብቷል። ፋሲል ከነማዎች ገና በመጀመሪያው አጋማሽ በቁጥር መጉደላቸው በተጋጣሚ ብልጫ ይፈጥርባቸዋል ተብሎ ሲጠበቅ ይበልጥ ብርታት ሁኗቸው መሪ መሆን የቻሉበትን ግብ ማስቆጠር ችለዋል። 43ኛው ደቂቃ ላይ ያሬድ ብርሃኑ ከሜዳው የግራ ክፍል በድንቅ ብቃቱ ተከላካዮችን አልፎ ያቀበለውን ኳስ ዳግም አወቀ ወደ ግብነት ቀይሮ ዐፄዎችን መሪ ማድረግ ችሏል።

ከዕረፍት መልስ የተጫዋች ቅያሪ በማድረግ ወደ ሜዳ የተመለሱት ወላይታ ድቻዎች 51ኛው ደቂቃ ላይ ከሳጥኑ የግራ ጠርዝ ላይ ቅዱስ ቂርቆስ ያቀበለውን ኳስ ተቀይሮ የገባው መሳይ ሰለሞን ክለቡን ወደ ጨዋታ የመለሰ ግብ ማስቆጠር ችሏል:: በሁለቱም ቡድኖች በኩል እየተጋጋለ በቀጠለው ጨዋታ መደበኛው የጨዋታ ሰዓት ተጠናቆ በተሰጠው ጭማሪ ደቂቃ 90+4 ላይ የፋሲል ከነማዎ ተጫዋች ዋሳዋ ጂኦፍሪ ከሳጥን ውጭ የመታው ሀይል የቀላቀለ የቅጣት ምት የግቡን አግዳሚ ገጭቶ የተመለሰ ሲሆን ይህም ለዐፄዎቹ አስቆጪ ሙከራ ነበር። ድቻዎችም ያገኙትን የቁጥር ብልጫ መጠቀም ተስኗቸው ጨዋታው 1-1 በሆነ አቻ ውጤት ተጠናቋል።
ወልዋሎ ዓ/ዩ ከ መቐለ 70 እንደርታ

ሁለቱን የሰሜን ቡድኖች ባገናኘው ጨዋታ 15ኛው ደቂቃ ላይ ከሜዳው የግራ ክፍል የተሻማውን ኳስ በጥሩ ንክኪ መቆጣጠር የቻለው ኮንኪን ሀፍዝ ወደ ግብ ቢመታውም ግብጠባቂው መሐመድ ዜጉ የመለሰበት ሲሆን ያንን የተመለሰ ኳስ በቅርብ የነበረው ጌትነት ተስፋየ በጥሩ ቅልጥፍና በድጋሚ ኳሷን በመምታት ግብ አስቆጥሮ ቢጫ ለባሾቹን መሪ ማድረግ ችሏል። በአጋማሹ ሌላ ይሄ ነው የሚባል የግብ ሙከራዎችን በሁለቱም ቡድን በኩል ሳያስመለከቱን ወደ መልበሻ ክፍል አምርተዋል።

ሁለተኛው አጋማሽ ላይ የተወሰደባቸውን የግብ ብልጫ ቀይረው ወደ ጨዋታ ለመመለስ ጥረት ያደረጉት መቐለዎች 60ኛው ደቂቃ ላይ ከተከላካይ ጀርባ የተጣለለትን ኳስ ብርሃኑ አዳሙ ወደ ሳጥን ይዞ በመግባት ከግብ ጠባቂው ጋር ፊት ለፊት የተገናኘ ቢሆንም የመታው ኳስ የግቡን ቋሚ ገጭቶ ተመልሷል ይህም ለምዓም አናብስቶች አስቆጭ ወርቃማ ዕድል ነበር። 63ኛው ደቂቃ ላይ የወልዋሎው ዳዊት ገብሩ ሆን ብሎ ኳሱን በእጅ መንካቱን ተከትሎ በሁለት ቢጫ ካርድ ከሜዳ ተሰናብቷል። ልክ እንደሱ ሁሉ የጨዋታው ሰዓት ተጠናቆ የዳኛ ፊሽካ በሚጠበቅበት ሰዓት ተቀይሮ የገባው የመቐሌው ቦና ዓሊ ዳኛ ጋር ባሳየው ያልተገባ ባህሪ በሁለት ቢጫ ካርድ ከሜዳ ተሰናብቷል። ቢጫ ለባሾቹ ጨዋታው 1-0 በሆነ ውጤት ምዓም አናብስቶችን በማሸነፍ በሊጉ የመጀመሪያ ሶስት ነጥባቸውን አሳክተዋል።

