የኮንፌድሬሽን ዋንጫ ቅድመ ማጣሪያ ጨዋታዎች ተጀምረዋል

የቶታል ካፍ ኮንፌድሬሽን ዋንጫ የቅድመ ማጣሪያ በተለያዩ የአፍሪካ ከተሞች በሳምነቱ መጨረሻ በተደረጉ ጨዋታዎች ተጀምረዋል፡፡ ድራማዊ ክስተት የያዩበት የቅድመ ማጣሪያ ጨዋታዎች ላይ ለመጀመሪያ ግዜ በውድድሩ ላይ እየተካፈለ የሚገኘው ወላይታ ድቻ ከሜዳው ውጪ ከዛንዚባሩ ዚማሞቶ ጋር አቻ ተለያይቷል፡፡

የሩዋንዳው ኤፒአር የሲሸልሱን አንስ ሪዩኒየን ኪጋሊ ላይ ገጥሞ 4-0 አሸንፏል፡፡ ጂሃድ ቢዚማና ሃትሪክ ሲሰራ ኢሳ ቢጊሪማና አንድ ግብ ለኤፒአር አክሏል፡፡ የጋናው አሻንቲ ኮቶኮ እና የኮንጎው ካራ ብራዛቪል ያደረጉት ጨዋታ ብዙዎችን ያስገረመ ክስተት አስተናግዷል፡፡ ከጨዋታው አንድ ቀን አስቀድሞ የካራ ብራዛቪል ተጫዋቾች በባባ ያራ ስፖርትስ ስታዲየም የመጨረሻ ልምምድ ከማድረግ ይልቅ በግቦቹ አቅራቢ የውሃ ሽንት መሽናታቸው የኮቶኮ ሃላፊዎች ያስቆጣ ሲሆን በጨዋታው ላይ አምስት የፍፁም ቅጣት ምቶች ተሰጥተው ኮቶኮ 1-0 አሸንፏል፡፡ ከተሰጡት አምስት ፍፁም ቅጣት ምቶች ኮቶኮ አራት አግኝቶ ሶስቱን ሲያመክን ካራ ብራዛቪል በአንፃሩ አንድ ስቷል፡፡ የኮቶኮን ማሸነፊያ ግብ ያኩቡ መሃመድ በፍፁም ቅጣት ምት አስገኝቷል፡፡

ከቻን ዋንጫ አሸናፊነት በኃላ ወደ ጨዋታ የተመለሰው ሞሮኳዊው አጥቂ አዩብ ኤል-ካቢ ክለብ በርካን የሴኔጋሉን ምቦር ፔቲትን 2-1 ሲያሸንፍ ግብ ማስቆጠር ችሏል፡፡

የማሊው ጆሊባ እና የቱኒዚያው ዩኤስ ቤን ጎርዳን ተጋጣሚዎቻቸውን ለጨዋታ መድረስ ባለመቻላቸው በቀጥታ ወደ ቀጣዩ ዙር ማለፍ ችለዋል፡፡ የላይቤሪያው ኤልዋ ዩናይትድ እና የደቡብ ሱዳኑ አል ሂላል ጁባ ለነበረባቸው ጨዋታዎች ሳይጓዙ ቀርተዋል፡፡