28ኛው ሳምንት የሲቢኢ የኢትዮጵያ ፕሪምየር ሊግ ዛሬ በሚደረጉ አራት መርሐ-ግብሮች ይቀጥላል፤ ጨዋታዎቹን የተመለከቱ መረጃዎችም እንደሚከተለው አቅርበንላችኋል
ኢትዮጵያ ቡና ከ አርባ ምንጭ ከተማ
ኢትዮጵያ ቡና ካለፉት አምስት ጨዋታዎች በሁለቱ ድል ቀንቶት በሁለቱ አቻ ተለያይቶ በአንዱ ብቻ ሽንፈት የገጠመው ሲሆን ይህም ቡድኑን ወደ መሪዎቹ ተከታዮች ለመጠጋት የሚያስችል መልካም ጉዞ ላይ እንዳለ ያሳያል። የቡድኑ ጥንካሬ በኳስ ቁጥጥር የበላይነት መጫወት ቢሆንም በ26 ጨዋታዎች 27 ግቦችን ብቻ ማስቆጠሩና በተመሳሳይ 27 ግቦችን ማስተናገዱ የፊት መስመር ውጤታማነቱ እና የተከላካይ ክፍሉ መረጋጋት አሁንም ትኩረት የሚሹ ደካማ ጎኖቹ መሆናቸውን ያሳያሉ።
በሌላ በኩል አርባ ምንጭ ከተማ በወራጅ ቀጠናው ውስጥ ሆኖ የሚያደርገው ጉዞ እጅግ ፈታኝ ቢሆንም ካለፉት አምስት ጨዋታዎች ባገኛቸው 7 ነጥቦች (2 ድል፣ 1 አቻ እና 2 ሽንፈት) የጀመረውን ተስፋ ሰጪ ጉዞ ነገም ለማስቀጠል ይፋለማል። አዞዎቹ ምንም እንኳን በመከላከል ረገድ ጠንካራ ለመሆን ቢጥሩም በ27 ጨዋታዎች ያስቆጠሯቸው 20 ግቦች ብቻ (በሊጉ ዝቅተኛው) ለነጥብ ማጣታቸው ዋነኛ ምክንያት የሆነው የፊት መስመር ድክመታቸው ነው። በነገው ጨዋታ ቡናዎች ወደ መሪዎቹ ለመጠጋት አርባ ምንጮች ደግሞ ከወራጅ ቀጠናው ለመውጣት የሚያደርጉት ትግል ጨዋታውን በታክቲክ እና በስሜት የታጀበ እንደሚያደርገው ይጠበቃል።
ሁለቱ ቡድኖች ከዚህ ቀደም ለ22 ጊዜያት የተገናኙ ሲሆን አርባምንጭ ከተማዎች 8 ጨዋታዎች በማሸነፍ የበላይነትን ሲይዙ ኢትዮጵያ ቡናዎች ደግሞ በ7 ጨዋታዎች ረተዋል። የተቀሩት 7 ጨዋታዎች ደግሞ በአቻ ውጤት ተጠናቀዋል።
ሲዳማ ቡና ከ ድሬዳዋ ከተማ
በኢትዮጵያ ፕሪምየር ሊግ የደረጃ ሰንጠረዥ ላይ በ51 ነጥብ ዙፋኑን ተቆጣጥሮ የሚገኘው ሲዳማ ቡና ዛሬ በሊጉ ያለውን መሪነት ይበልጥ ለማፅናት ወደ ሜዳ ይገባል። ካለፉት አምስት ጨዋታዎች በሦስቱ ድል ቀንቶት በከፍተኛ በራስ መተማመን ላይ የሚገኙት ሲዳማ ቡናዎች በ27 ጨዋታዎች 17 ግቦችን ብቻ ያስተናገደው ጠንካራው የመከላከል አጥር ዋነኛ መለያቸው ሆኖ ቀጥሏል። ይሁን እንጂ ቡድኑ ግብ ካስቆጠረ በኋላ ውጤቱን ለማስጠበቅ ወደ ኋላ የሚያፈገፍግበት የታክቲክ ምርጫው ለተጋጣሚው የኳስ ቁጥጥር ዕድል በመስጠት ለድንገተኛ አደጋ ሊያጋልጠው የሚችል ስጋት ነው።
በተቃራኒው በደረጃ ሰንጠረዡ 15ኛ ደረጃ ላይ ተቀምጦ ለተሻለ ውጤት የሚተጋው ድሬዳዋ ከተማ ካለፉት አምስት ጨዋታዎች መሰብሰብ ከነበረበት 15 ነጥብ 4 ነጥብ ብቻ ማግኘቱ ወቅታዊ ብቃቱ መውረዱን ያሳያል። የምስራቁ ቡድን በመስመር ላይ በሚያደርጋቸው ፈጣን ሽግግሮች ረገድ ጠንካራ መሆኑ የሚታወቅ ቢሆንም በ27 ጨዋታዎች 27 ግቦችን ያስተናገደው የኋላ ክፍሉ ግን ምህረት ለሌላቸው ለሲዳማ አጥቂዎች ክፍተት ሊፈጥር ይችላል። ጨዋታው በሊጉ እጅግ ጠንካራ የመከላከል አደረጃጀት ባለው ሲዳማ ቡና እና ራሱን ካለበት የወጥነት ችግር ለማስታረቅ በሚፋለመው ድሬዳዋ ከተማ መካከል የሚደረግ በመሆኑ ጨዋታውን ተጠባቂ ያደርገዋል።
ድሬዳዋ ከተማ እና ሲዳማ ቡና እስካሁን በሊጉ 25 ጊዜ ተገናኝተዋል። ከእነዚህ ግንኙነቶች ሲዳማ ቡና 10 ጊዜ በማሸነፍ ቀዳሚ ሲሆን 5 ጊዜ ደግሞ ድሬዳዋ ከተማ ረቷል፤ ቀሪዎቹ 10 የእርስ በርስ ግንኙነቶች በአቻ ውጤት የተፈፀሙ ነበሩ። በጨዋታዎቹ ሲዳማ ቡና 26 ድሬዳዋ ከተማ ደግሞ 18 ግቦችን አስቆጥረዋል።
ነገሌ አርሲ ከ ሀድያ ሆሳዕና
በሊጉ በሚደረገው የዋንጫ ፉክክር ላይ ለመቆየት የሚፋለመው ነገሌ አርሲ በዛሬው ጨዋታ በ43 ነጥብ 3ኛ ደረጃ ላይ ተቀምጦ ከሀዲያ ሆሳዕና ጋር በሚያደርገው ጨዋታ ወደ ድል መንገድ ለመመለስ ይፋለማል። ቡድኑ ካለፉት አምስት ጨዋታዎች ያገኘው 6 ነጥብ (1 ድል፣ 3 አቻ እና 1 ሽንፈት) ሲሆን ይህም በደረጃ ሰንጠረዡ የላይኛው ክፍል ለመቆየት የሚያደርገውን ጉዞ በነጥብ መጋራት ምክንያት ፈታኝ አድርጎበታል። የነገሌ አርሲ ዋነኛ ጥንካሬ የተጋጣሚን የጨዋታ ፍሰት በመሃል ሜዳ ላይ መግታት መቻሉ እና በግዙፍ ተከላካዮች የተደራጀ የተከላካይ መስመሩ ቢሆንም በ27 ጨዋታዎች 26 ግቦችን ብቻ ማስቆጠሩና በአምስት ጨዋታዎች ውስጥ አንዴ ብቻ ማሸነፉ አሁንም በግንባር ቀደምትነት የሚጠቀስ “የጨራሽ አጥቂ” እጥረት እንዳለበት ያመላክታል።
በአንጻሩ በ33 ነጥብ 11ኛ ደረጃ ላይ የሚገኘው ሀዲያ ሆሳዕና ካለፉት አምስት ጨዋታዎች 5 ነጥብ (1 ድል፣ 2 አቻ እና 2 ሽንፈት) በመሰብሰብ የተጋጣሚውን ያህል ተቀራራቢ ውጤት አስመዝግቧል። የሆሳዕናዎች ጥንካሬ በአካል ብቃት የታገዘ እና ፈጣን በሆኑ የመስመር አጥቂዎቻቸውን ዒላማ ያደረገ አጨዋወት ቢሆንም በ27 ጨዋታዎች 29 ግቦችን ያስተናገደው የኋላ ክፍላቸው ግን አሁንም ይበልጥ መሻሻልን ይፈልጋል። ጨዋታው ነገሌ አርሲ ከመሪው ያለውን ርቀት የሚያጠብበት ሀድያ ሆሳዕና ደግሞ ከደረጃ ሰንጠረዡ አማካይ ክፍል ላለመውረድ የሚጥርበት በመሆኑ በሁለቱም ወገን ጥንቃቄ የታከለበት የታክቲክ ፍልሚያ እንደሚታይ ይጠበቃል።
ሁለቱ ቡድኖች በሊጉ አንድ ጊዜ የተገናኙ ሲሆን ነገሌ አርሲ ድል በማድረግ ቀዳሚ ነው። በጨዋታውም ነገሌ 2፣ ሀድያ 1 ግብ አስቆጥረዋል።
መቻል ከ ሀዋሳ ከተማ
መቻል በሊጉ የደረጃ ሰንጠረዥ ሁለተኛ ደረጃን (43 ነጥብ) በመያዝ ዛሬ ምሽት ከሀዋሳ ከተማ ጋር ለሚያደርገው ወሳኝ ፍልሚያ ወደ ሜዳ ይገባል። ቡድኑ ካለፉት አምስት ጨዋታዎች በሁለቱ ድል ቀንቶት በሦስቱ አቻ በመለያየት ሽንፈት ሳያስተናግድ መጓዙም ደረጃውን እንዲያሻሽል ረድቶታል።
የቡድኑ ዋነኛ ጥንካሬ በሊጉ ሁለተኛው ከፍተኛ ግብ አስቆጣሪ ቡድን (35 ግቦች) ያደረገው ውጤታማ የማጥቃት መስመሩ ቢሆንም አልፎ አልፎ በመከላከል መዋቅሩ ላይ የሚታዩ የትኩረት ማጣት ክፍተቶች በተጋጣሚው ፈጣን የመልሶ ማጥቃት ሽግግር ሊፈተኑ የሚችሉ የቡድኑ ስጋቶች ናቸው።
በተቃራኒው በ42 ነጥብ 4ኛ ደረጃ ላይ የተቀመጠው ሀዋሳ ከተማ መቻልን አልፎ ወደ ሁለተኛ ደረጃ ለመሻገር የሚያስችለውን ነጥብ ለማግኘት ወደ ሜዳ ይገባል። ሀዋሳዎች ካለፉት አምስት ጨዋታዎች አንድ ድል፣ ሁለት አቻ እና ሁለት ሽንፈት ያስመዘገቡ ሲሆን ይህም በውጤት ወጥነት ረገድ መዋዠቅ እንዳለባቸው ያሳያል። የሀዋሳ ከተማ ጥንካሬ በተጫዋቾች ግላዊ ብቃት ላይ የተመሰረተ ፈጣን ማጥቃት ቢሆንም በ27 ጨዋታዎች 21 ግቦችን ያስተናገደው የኋላ ክፍላቸው የሊጉን ጠንካራ የማጥቃት መስመር “በምን ያህል ብቃት ይገታል?” የሚለው ጥያቄ ጨዋታውን በጉጉት እንዲጠበቅ አድርጎታል። ይህ ፍልሚያ በሊጉ አናት ላይ ያለውን የነጥብ ልዩነት የሚወስን በመሆኑ የሳምንቱ ድንቅ ጨዋታ እንደሚሆን ይጠበቃል።
ሁለቱ ቡድኖች 37 ጊዜ ተገናኝተዋል። ሀዋሳ ከተማ 16 በማሸነፍ ቅድሚያውን ሲይዝ መቻል 10 ጨዋታ አሸንፏል። ቀሪዎቹ 11 ጨዋታዎች አቻ የተለያዩባቸው ግንኙነቶች ናቸው። በጎሎች የታጀበ ታሪክ ያለው ይህ ግንኙነት 87 ጎሎች የተቆጠሩበት ሲሆን ሀዋሳ 48 መቻል በበኩሉ 39 ጎሎችን አስቆጥረዋል።
በመቻል በኩል እንደባለፈው የጨዋታ ሳምንት ውብሸት ጭላሎ እና ቻላቸው መንበሩ በጉዳት እንዲሁም ዳዊት ማሞ በቅጣት ከዛሬው ጨዋታ ውጭ ናቸው። በሀዋሳ ከተማ ጌታነህ ከበደ በአምስት ቢጫዎች ምክንያት ከዛሬው ጨዋታ ውጪ ሲሆን እስራኤል እሽቱ እና ፈቃደስላሴ ደሳለኝ ደግሞ ከቅጣት ተመልሰው ለጨዋታው ዝግጁ መሆናቸው ታውቋል።