በኢትዮጵያ ቡና ደጋፊዎች በኩል የታየው ሽንፈትን ወደ ተጫዋቾች ስነ-ልቦናዊ ጥንካሬ ለመቀየር የተደረገ ተግባር አንደኛው የሳምንቱ ትኩረታችን አጀንዳ ነው።
የኢትዮጵያ ቡና ደጋፊዎች ከትናንት በስትያ ቡድናቸው በነገሌ አርሲ 3 ለ 0 በሆነ ሰፊ የግብ ልዩነት ቢሸነፍም ጨዋታው ከተጠናቀቀ በኋላ ቡድናቸውን በጨዋነት እና በከፍተኛ ጭብጨባ ወደ መልበሻ ክፍል መሸኘታቸው በሀገራችን እግር ኳስ ውስጥ እጅግ የሚደነቅ እና ሊቀጥል የሚገባው የላቀ የስፖርታዊ ጨዋነት ማሳያ ነው። ብዙ ጊዜ በሀገራችን የእግር ኳስ ባህል ሽንፈት በሚገጥምበት ወቅት ቁጣ፣ ተቃውሞ ወይም አልፎ አልፎ ያልተገባ ስሜታዊነት የሚታይበት ሁኔታ አለ። ነገር ግን የኢትዮጵያ ቡና ደጋፊዎች ያሳዩት ምላሽ የእውነተኛ ደጋፊነት (True Fandom) ትርጉም እና ጥበብ ምን እንደሆነ በግልጽ ያሳየ አርአያነት ያለው ተሞክሮ ነው።
እግር ኳስ የማሸነፍ፣ እኩል የመውጣት እና የመሸነፍ ድምር ውጤት እንደመሆኑ መጠን እውነተኛ ደጋፊ ማለት ቡድኑ ሲያሸንፍ ብቻ ሳይሆን ሲሸነፍ እና ፈተና ውስጥ ሲወድቅም ጭምር ከጎኑ የሚቆም ነው። ተጫዋቾች በተለይም ወጣቶች ከባድ ሽንፈት ሲገጥማቸው ከደጋፊው የሚያገኙት ወቀሳ ሳይሆን መደገፍና መበረታታት ለቀጣዩ ጨዋታ በፍጥነት በስነ-ልቦና እንዲያገግሙ (Mental Recovery) ያደርጋቸዋል። በተጨማሪም ደጋፊው በሽንፈት ቀን እንኳ ፍቅር እና አክብሮት ሲሰጥ ተጫዋቾች ለክለቡ እና ለደጋፊው ሲሉ በቀጣይ ጨዋታዎች የተሻለ ብቃት ለማሳየት ከበፊቱ በላይ የመታገል እና የኃላፊነት ስሜት ያድግባቸዋል።
ይህ የኢትዮጵያ ቡና ደጋፊዎች ተሞክሮ በዓለም አቀፍ እግር ኳስ ደረጃ ትልልቅ እና ስኬታማ ክለቦች ዘንድ የሚታወቅ የደስተኛ እና ታማኝ ደጋፊዎች ባህል ነው። ለምሳሌ የእንግሊዙ ሊቨርፑል ክለብ ደጋፊዎች “You’ll Never Walk Alone” የሚለውን መፈክራቸውን በተግባር የሚያሳዩት በሽንፈት ወቅት በተጫዋቾቻቸው ላይ ያላቸውን እምነት በመዝሙር ሲገልጹ ነው። በተመሳሳይ የጀርመኑ ቦሩሲያ ዶርትሙንድ “Yellow Wall” በመባል የሚታወቁት ደጋፊዎች ቡድናቸው በሜዳውም ሆነ ከሜዳው ውጭ ቢሸነፍ እንኳን ጨዋታው ሲያልቅ ተጫዋቾቹን በመጥራት በጭብጨባ አክብሮት ይሰጣሉ። በብሔራዊ ቡድን ደረጃም በቅርቡ የጃፓን ብሔራዊ ቡድን ደጋፊዎች ቡድናቸው በዓለም ዋንጫ ቢሸነፍ እንኳ ተጫዋቾቻቸውን በክብር ሸኝተው ስታዲየም ሲያፀዱ አስተውለናል። ለአብነት እነዚህን አነሳን እንጂ በዓለም እግርኳስ ላይ በመሰል ተግባራት የሚታወቁ ደጋፊዎች ብዙ አሉ። ይህም ባህል በሀገራችን እግርኳስ እምብዛም ያልተለመደ ሲሆን ቡናማዎቹ ግን በብዙ ተስፋዎች ውስጥ ሆነው የሚጠብቁት ቡድናቸው ከ9 ነጥብ 3 ብቻ ቢያሳካም በቶሎ ጀርባቸውን መስጠት አልፈለጉም።
በአጠቃላይ የኢትዮጵያ ቡና ደጋፊዎች በነገሌ አርሲው ጨዋታ ያሳዩት ምላሽ የሽንፈት ቁስል ሳይሆን የደጋፊነት ውበት እና የላቀ ስፖርታዊ ጨዋነት ነው። ሽንፈትን በፀጋ መቀበል በስታዲየም ውስጥ የሚከሰቱ አላስፈላጊ ረብሻዎችን ሙሉ በሙሉ የሚያስቀር ሲሆን ክለብን መደገፍም ከ90 ደቂቃ ውጤት በላይ መሆኑን ያሳያል። ይህ መልካም አርአያ በኢትዮጵያ ፕሪሚየር ሊግ ሁሉም ክለቦች ዘንድ እንደ ትልቅ የደጋፊዎች ባህል ሊዳብር እና ሊቀጥል እንደሚገባው መጠቆም እንወዳለን።