ኢትዮ ኤሌክትሪክ የመጨረሻውን ጨዋታ በድል አጠናቋል

ሲዳማ ቡናዎች በኢትዮ ኤሌክትሪክ 1 ለ 0 ከተሸነፉ በኋላ የሻምፒዮንነት ዋንጫውን በይፋ ተረክበዋል።

የውድድር ዓመቱ ማጠቃለያ እና መዝጊያ በሆነው በዚህ መርሃ ግብር ገና ሦስት ጨዋታዎች እየቀሩት የዘንድሮውን የሊግ ዋንጫ ማረጋገጥ የቻለው ሲዳማ ቡና ከኢትዮ ኤሌክትሪክ ጋር ተገናኝቷል። በታሪካቸው ለመጀመሪያ ጊዜ የሻምፒዮንነት ክብርን የተቀናጁት ሲዳማ ቡናዎች ለዚህ ጨዋታ አብዛኞቹን ወሳኝ እና ቁልፍ ተጫዋቾቻቸውን በተቀያሪ ወንበር ላይ በማስቀመጥ ለመጀመር መርጠዋል። ጨዋታውም ስታዲየሙን በደመቁ ነጭ ልብሶች ባሸበረቁ በርካታ የሲዳማ ቡና ደጋፊዎች እጅግ ማራኪ ዝማሬ እና ድጋፍ ታጅቦ በታላቅ ድምቀት ተጀምሯል።

በመጀመሪያው አጋማሽ የነበረው የሜዳ ላይ ፉክክር በኳስ ቁጥጥር ረገድ የሁለቱንም ቡድኖች ተመጣጣኝ ተሳትፎ ያስመለከተን ቢሆንም ወደ ግብ ክልል ተጠግቶ አደገኛ ሙከራዎችን በመፍጠር በኩል ግን የኢትዮ ኤሌክትሪክ ተጫዋቾች የተሻለ ብልጫ ማሳየት ችለው ነበር። ኤሌክትሪኮች ተደጋጋሚ እና ተከታታይ የሆኑ የግብ ዕድሎችን በመፍጠር የሻምፒዮኖቹን የኋላ ክፍል ደጋግመው የፈተኑ ቢሆንም ያሳዩት የላቀ እንቅስቃሴ ግን ወደ ግብነት ሳይቀየር ቀርቷል። በዚህም ምክንያት የመጀመሪያው 45 ደቂቃ ያለምንም ግብ 0 ለ 0 በሆነ ውጤት ተጠናቆ ቡድኖቹ ወደ መልበሻ ክፍል አምርተዋል።

ከእረፍት መልስ የሲዳማ ቡና ተጫዋቾች መሪነቱን ለመያዝ በከፍተኛ ተነሳሽነት ተደጋጋሚ ጥረቶችን ማድረግ የጀመሩ ቢሆንም በፈጣን እንቅስቃሴያቸው ላይ ቀዝቃዛ ውሃ የቸለሰ ያልተጠበቀ አጋጣሚ ተፈጥሯል። በራሳቸው የገደብ ክልል ውስጥ ኳስ በእጅ መነካቱን ተከትሎ ለኢትዮ ኤሌክትሪክ የተሰጠውን የፍጹም ቅጣት ምት አቤል ሀብታሙ ወደ ግብነት ቀይሮ ኤሌክትሪኮችን መሪ ማድረግ ችሏል።

ከግቧ መቆጠር በኋላ ሻምፒዮናዎቹ ሲዳማ ቡናዎች የአቻነት ግብ ፍለጋ ወደ ተቃራኒው የግብ ክልል በመጠጋት ተከታታይ ጫናዎችን ለመፍጠር ቢሞክሩም የኤሌክትሪክን ጠንካራ መከላከል ሰብረው ለመግባት ሳይሳካላቸው ቀርቷል። በዚህም ምክንያት ጨዋታው በኢትዮ ኤሌክትሪክ 1 ለ 0 አሸናፊነት ተጠናቋል። ሲዳማ ቡናዎች በዕለቱ ጨዋታ በሽንፈት ቢሸኙም ከፉክክሩ ማክተም በኋላ ግን በታሪካቸው ለመጀመሪያ ጊዜ ያረጋገጡትን የሊግ ዋንጫ በታላቅ ኩራትና ድምቀት ወደ ከፍ አድርገው በማንሳት ደስታቸውን ከደጋፊዎቻቸው ጋር አብረው አክብረዋል።