ሪፖርት| አዳማ ከተማ በሊጉ መቆየቱን አረጋግጧል

አዳማ ከተማዎች በአህመድ ሁሴን ሁለት ግቦች እና በቢንያም አይተን ተጨማሪ ጎል ሐዋሳ ከተማን 3 ለ 2 በመርታት በቀጣዩ ዓመት በሊጉ ለመቆየት የሚያስችላቸውን ትኬት ቆርጠዋል።

ከወራጅነት ስጋት ለመገላገል ወሳኝ በሆነው የ37ኛ ሳምንት የሊጉ ማጠቃለያ ፍልሚያ ጨዋታው ገና ከጅምሩ ከፍተኛ የግብ ፍላጎት የተስተዋለበት ሲሆን በመጀመሪያዎቹ 45 ደቂቃዎች ብቻ አራት ግቦች የተቆጠሩበት እጅግ ፈጣን እንቅስቃሴ በሜዳ ላይ ሲንጸባረቅ ነበር።

ገና በ9ኛው ደቂቃ ላይ ሳሙኤል ዮሐንስ ከግራ መስመር በረጅሙ ያቀበለውን ኳስ አህመድ ሁሴን የሐዋሳ ተከላካዮችን በጥሩ ብቃት ጥሶ በመውጣት ቀዳሚዋን ግብ ከመረብ አገናኝቷል። አዳማዎች የወራጅነት ቀጠናውን ጥለው ለመውጣት ያላቸውን ጉልበት ባሳየ መልኩ ጥቃታቸውን በመቀጠል በ18ኛው ደቂቃ ላይ ሁለተኛ ግብ ያስመዘገቡ ሲሆን ሳሙኤል ዮሐንስ ከማዕዘን ምት ያሻማውን ኳስ አህመድ ሁሴን በድጋሚ በግንባሩ በመግጨት ለራሱና ለቡድኑ ሁለተኛውን ግብ አስቆጥሯል።

ሐዋሳ ከተማዎች በ20ኛው ደቂቃ ላይ ቢንያም በላይ ያመቻቸለትን ኳስ ጌታነህ ከበደ ከሳጥን ውጭ አክርሮ በመምታት የግብ ልዩነቱን ወደ 2ለ1 ቢያጠብብም አዳማዎች ግን ሳይደናገጡ በ24ኛው ደቂቃ ላይ ሦስተኛ ግብ አክለዋል፤ አብዱልከሪም መሐመድ ያቀበለውን ኳስ ቢንያም አይተን ከሳጥን ውጭ በጥሩ አጨራረስ መረቡ ላይ አሳርፎታል። በዚህም መነሻነት አዳማ ከተማ በሊጉ ለመቆየት የሚያስችለውን ትልቅ እምርታ ያሳየበትን የመጀመሪያ አጋማሽ በ3ለ1 መሪነት አጠናቆ ወደ እረፍት አምርቷል።

በአዲስ አበባ በጣለው ከባድ ዝናብ ምክንያት የሁለተኛው አጋማሽ መጀመሪያ ለ40 ደቂቃ ያህል ለመዘግየት የተገደደ ሲሆን ከዕረፍተ መልስ ግን የሐዋሳ ከተማ ተጫዋቾች የአጥቂ መስመር ጫናቸውን አጠናክረው በመቀጠል በተባረክ ሒፋሞ እና በበረከት ሳሙኤል አማካኝነት ተከታታይ ሙከራዎችን ሰንዝረዋል። በዚህም ግፊት በ60ኛው ደቂቃ ላይ ከማዕዘን ምት የተሻማውን ኳስ ተቀይሮ የገባው እስራኤል ሰማያት በግንባሩ በመግጨት የግብ ልዩነቱን ወደ 3ለ2 ማጥበብ ችሏል። ግቧ ከተቆጠረች በኋላ ከፍተኛ ጫና ውስጥ የገቡት አዳማ ከተማዎች የኋላ መስመራቸውን በስድስት ተከላካዮች እና በሁለት የመከላከል ባህሪ ባላቸው አማካዮች ሙሉ በሙሉ በመቆለፍ ውጤቱን ለማስጠበቅ ተገደዋል። በስተመጨረሻም ጨዋታው በዚሁ በ3ለ2 ውጤት መጠናቀቁን ተከትሎ አዳማ ከተማዎች ከእልህ አስጨራሽ ትግል በኋላ ወሳኝ የሊጉን ቆይታ የሚያረጋግጡበትን ባለድልነት በይፋ አውጀዋል።