የሲቢኢ የኢትዮጵያ ፕሪሚየር ሊግ የ25ኛ ሳምንት ጨዋታዎች ዛሬም መካሄዳቸውን ሲቀጥሉ ጨዋታዎቹን የተመለከቱ መረጃዎች እንደሚከተለው አሰናድተንላችኋል።
ሀዲያ ሆሳዕና ከ ቅዱስ ጊዮርጊስ
ሀዲያ ሆሳዕና በ29 ነጥብ 12ኛ ደረጃ ላይ ተቀምጦ ጨዋታውን የሚጀምር ሲሆን ካለፉት አምስት ጨዋታዎች በሁለቱ ሽንፈትና በሁለቱ አቻ ውጤት ተገትቶ በመጨረሻው ሳምንት በሸገር ከተማ 2 ለ 0 መሸነፉ ለዛሬው ጨዋታ በከፍተኛ የነጥብ ጥማት ውስጥ እንዲገባ አድርጎታል። ቡድኑ ካለፉት አምስት ጨዋታዎች በሦስቱ ግብ ማስቆጠር አለመቻሉ በአጥቂ መስመሩ ላይ ያለውን የፈጠራ ድክመት የሚያሳይ ቢሆንም በተከላካይ ክፍሉ በ24 ጨዋታዎች 25 ግቦችን ብቻ በማስተናገድ የሚያሳየው ጥንካሬ ዛሬም የፈረሰኞቹን ጥቃት ለመቋቋም ትልቅ መተማመኛ ይሆነዋል። ሀዲያ ሆሳዕና በሜዳ ላይ የሚታይበትን የሚፈጥራቸውን የግብ ዕድሎች በአግባቡ ወደ ውጤት የመቀየር ድክመት ቀርፎ ካለፉት ሳምንታት መጥፎ አጋጣሚዎች ለመውጣት ዛሬ ጠንካራ ብቃቱን ማሳየት ይኖርበታል።
በሌላ በኩል በታሪኩ እጅግ ፈታኝ ወቅት ላይ የሚገኘው ቅዱስ ጊዮርጊስ በ25 ነጥብ 18ኛ ደረጃ ላይ ተቀምጦ ወደ የሚገኝ ሲሆን ካለፉት አምስት ጨዋታዎች በአራቱ ሽንፈትና በአንዱ አቻ ውጤት መገደቡ በክለቡ ላይ ትልቅ ስጋት ደቅኗል። በ23 ጨዋታዎች 16 ግቦችን ብቻ ያስቆጠሩት ፈረሰኞቹ ግብ ካስቆጠሩ 59 ቀናት የተቆጠሩ ሲሆን ባለፉት አራት ጨዋታዎችም አንድም ግብ ማስቆጠር አለመቻላቸው በቡድኑ ላይ ትልቅ የሥነ-ልቦና ጫና ፈጥሯል። ዛሬ ከወራጅ ቀጠናው ስጋት ለመውጣትና የተከታታይ ሽንፈቶችን አዙሪት ለመስበር የግድ ማሸነፍ የሚኖርባቸው ሲሆን የቡድኑ አማካዮች እና አጥቂዎች ያለባቸውን የቅንጅት ችግር አርመው መቅረብ ከቻሉ ለውጤት የሚያበቃቸውን ግብ ለማግኘት ዕድል ይኖራቸዋል።
በሀዲያ ሆሳዕና በኩል ጫላ ተሺታ እና መለሰ ሚሻሞ በጉዳት ምክንያት የማይኖሩ ሲሆን በቅዱስ ጊዮርጊስ በኩል ሻይዱ ሙስጠፋ እና ቧይ ኪዊት በጉዳት የማይኖሩ ተጫዋቾች ናቸው።
ቡድኖቹ እስካሁን አስራ ሶስት ጊዜ ተገናኝተዋል። ሁለቱም ቡድኖች እኩል አራት አራት ጊዜ ድል ሲያደርጉ አምስት ጊዜ ደግሞ ነጥብ ተጋርተዋል። በጨዋታዎቹ ቅዱስ ጊዮርጊስ አስር ሀዲያ ሆሳዕና ደግሞ ስድስት ግቦች አስቆጥረዋል።
ወላይታ ዲቻ ከ ኢትዮጵያ ንግድ ባንክ
ባለፉት አምስት ጨዋታዎች ሽንፈት ሳያስተናግድ (3 ድል እና 2 አቻ) በአንጻራዊ ሁኔታ በጥሩ ግስጋሴ ላይ የሚገኘው ወላይታ ዲቻ ዛሬ በ27 ነጥብ 17ኛ ደረጃ ላይ ሆኖ ወደ ሜዳ ይገባል። ዲቻ በሊጉ ባደረጋቸው 24 ጨዋታዎች 26 ግቦችን አስቆጥሮ በተመሳሳይ 26 ግቦችን ያስተናገደ ሲሆን ይህም የግብ ልዩነቱ 0 እንዲሆን አድርጎታል። ቡድኑ በሚያደርጋቸው ጨዋታዎች ላይ ያለው የማጥቃት ወጥነትና ተጋጣሚን የማስጨነቅ ብቃት የቡድኑ ዋነኛ ጥንካሬ ቢሆንም አልፎ አልፎ በተከላካይ ክፍሉ ላይ የሚታዩት የመዘናጋት ክፍተቶች ነጥብ እንዲጥል ምክንያት ሲሆኑት ይስተዋላል። ዛሬም ይህንን የቅርብ ጊዜ ውጤታማነቱን አስቀጥሎ ከወራጅ ቀጠናው ስጋት ለመራቅ የተከላካይ መስመሩን ጥንካሬ ከፈጣን መልሶ ማጥቃት ጋር አቀናጅቶ መጠቀም ይኖርበታል።
በአንፃሩ በአሁኑ ወቅት በደረጃ ሰንጠረዡ 10ኛ ደረጃ ላይ የሚገኘው የኢትዮጵያ ንግድ ባንክ ካለፉት አምስት ጨዋታዎች በሁለቱ ተከታታይ ድል ቀንቶት በጥሩ መነሳሳት ላይ ይገኛል። በተለይም በሀዋሳ ከተማ ላይ ያስመዘገበው የ 4 ለ 2 ድል ለቡድኑ የአጥቂ መስመር ትልቅ መነቃቃትን የፈጠረ ሲሆን በሊጉ ባደረጋቸው 25 ጨዋታዎች ላይ ያለው የግብ የማስቆጠር ብቃትም የሚናቅ አይደለም። ሆኖም የባንክ ትልቁ ፈተና በየጨዋታው ግቦችን በቀላሉ ማስተናገዱ ሲሆን ይህም በሊጉ ብዙ ግቦች ከተቆጠሩባቸው ቡድኖች አንዱ እንዲሆን አድርጎታል። በዛሬው ጨዋታ ነጥብ ይዞ ለመውጣት ያንን ውጤታማ የማጥቃት እንቅስቃሴውን ከጠንካራ የመከላከል ስልት ጋር ማዋሃድና የዲቻን ፈጣን የመስመር ጥቃት መግታት ይጠበቅበታል።
በወላይታ ድቻ በኩል ሙሉቀን አዲሱ በቅጣት አማኑኤል ኦልሶ ደግሞ በጉዳት ምክንያት የማይኖሩ ሲሆን በኢትዮጵያ ንግድ ባንክ በኩል ሁሉም የቡድኑ አባላት ለዛሬው ጨዋታ ዝግጁ ናቸው።
ሁለቱ ቡድኖች በሊጉ 13 ጊዜ የግንኙነት ታሪክ ያላቸው ሲሆን ንግድ ባንክ አራት ድቻ ደግሞ ሦስት ጨዋታዎች ሲረቱ ቀሪዎቹ 6 ጨዋታዎች ደግሞ በአቻ ውጤት ተቋጭተዋል። ወላይታ ድቻ 14 ሲያስቆጥር ንግድ ባንክ በአንፃሩ 17 አስቆጥሯል።
ኢትዮጵያ መድን ከ ኢትዮጵያ ቡና
የደረጃ ሰንጠረዡ አጋማሽ ላይ ፉክክር እያደረገ የሚገኘው ኢትዮጵያ መድን ዛሬ በ28 ነጥብ 14ኛ ደረጃ ላይ ሆኖ የቡናን ፈጣን አጥቂዎች ለመገደብ ወደ ሜዳ ይገባል። ቡድኑ ካለፉት አምስት ጨዋታዎች በሁለቱ ድል ቀንቶት በሁለቱ አቻ በመለያየት በአንዱ ብቻ ሽንፈት ማስተናገዱ በአንጻራዊነት ወጥ የሆነ ጉዞ እያደረገ የሚገኝ ሲሆን የመድን ዋነኛ መለያ በ24 ጨዋታዎች 18 ግቦችን ብቻ ያስተናገደው ብርቱ የኋላ ክፍሉ ቢሆንም በአንጻሩ 19 ግቦችን ብቻ ማስቆጠሩ በአጥቂ መስመሩ ላይ የቀረ የቤት ስራ እንዳለ ያሳያል። ዛሬም ይህንን የብረት አጥሩን መሠረት በማድረግ የቡናን የኳስ ቁጥጥር ብልጫ መግታትና በመልሶ ማጥቃት የሚገኙ አጋጣሚዎችን ወደ ግብ መቀየር ከቻለ ደረጃውን ለማሻሻል ትልቅ ዕድል ይኖረዋል።
በአንጻሩ በሊጉ አስደናቂ ግስጋሴ እያደረገ የሚገኘው ኢትዮጵያ ቡና በ32 ነጥብ 9ኛ ደረጃ ላይ ተቀምጦ ጨዋታውን ይጀምራል። ካለፉት አምስት ጨዋታዎች አራቱን በድል በማጠናቀቅ አንድ ሽንፈትን ብቻ በማስተናገድ ድንቅ ወቅታዊ አቋም ላይ የሚገኘው ቡና በ23 ጨዋታዎች 23 ግቦችን በማስቆጠር ጥሩ የሚባል የማጥቃት እንቅስቃሴ እያሳየ ነው ምንም እንኳን በሊጉ 24 ግቦች ቢቆጠሩበትም ባለፉት አምስት ጨዋታዎች አራቱን ግብ ሳይቆጠርበት (Clean sheet) መውጣቱ የተከላካይ ክፍሉ መረጋጋት ማሳያ ነው። የዛሬው ጨዋታ የቡናን የፈጠራ አማካዮች ብቃት ከመድን ጠንካራ መከላከል ጋር የሚያገናኝ በመሆኑ ቡና የኳስ ቁጥጥር የበላይነቱን ተጠቅሞ የመድንን አጥር ሰብሮ መውጣት ከቻለ ወደ መሪዎቹ ተርታ ለመሰለፍ የሚያደርገውን ጉዞ ያፋጥነዋል።
ኢትዮጵያ መድን በዛሬው ጨዋታ የዋንጫ ቱትን ግልጋሎት በጉዳት ምክንያት የማያገኙ ይሆናል።
ሁለቱ ቡድኖች በሊጉ 32 ጊዜ ተገናኝተው ኢትዮጵያ ቡና 14 ጨዋታ በማሸነፍ ቀዳሚ ሲሆን መድን 9 ጊዜ አሸንፏል ፤ 9 ጊዜ ደግሞ አቻ ተለያይተዋል። ኢትዮጵያ ቡና 51 ጎሎች ሲያስቆጥር ኢትዮጵያ መድን 36 ጎሎች አስቆጥሯል።
መቐለ 70 እንደርታ ከ ሲዳማ ቡና
የሊጉን መሪ የመግጠም ከባድ ፈተና የደረሰው መቐለ 70 እንደርታ በአሁኑ ወቅት በ23 ነጥብ 19ኛ ደረጃ ላይ ተቀምጦ የህልውና ትግል እያደረገ ይገኛል። ቡድኑ ካለፉት አምስት ጨዋታዎች መካከል ሦስቱን በሽንፈት ማጠናቀቁ እና በ24 ጨዋታዎች ያስቆጠረው የግብ መጠን 15 ብቻ መሆኑ በሊጉ ደካማው የማጥቃት መስመር ባለቤት እንደሆነ ያሳያል። ሆኖም ባለፉት ሁለት ጨዋታዎች በድል እና በአቻ ውጤት ያሳየው መጠነኛ መነቃቃት ለዛሬው ጨዋታ ተስፋ ሰጪ ነው። መቐለ ዛሬ ከወራጅ ቀጠናው ለመውጣት እና የሲዳማን አስፈሪ ጥቃት ለመቋቋም በ24 ጨዋታዎች 25 ግቦችን ያስተናገደውን የተከላካይ ክፍሉን በአግባቡ ማደራጀትና አጋጣሚዎችን ወደ ግብ መቀየር ግዴታው ይሆናል።
በአንጻሩ የሊጉን የደረጃ ሰንጠረዥ በ45 ነጥብ በአንደኝነት እየመራ ያለው ሲዳማ ቡና ዛሬም መሪነቱን ይበልጥ ለማጠናከር ወደ ሜዳ ይገባል። ካለፉት አምስት ጨዋታዎች አራቱን በማሸነፍ ድንቅ ብቃቱን እያስመሰከረ የሚገኘው ሲዳማ በሊጉ 30 ግቦችን በማስቆጠር እና 14 ግቦችን ብቻ በማስተናገድ (የ +16 የግብ ልዩነት) ሚዛናዊ የሆነ ጥንካሬውን አሳይቷል። የሲዳማ ቡና ዋነኛ ጥንካሬ በሊጉ እጅግ ጠንካራ የተከላካይ ክፍል ያለው መሆኑ ሲሆን ዛሬም ይህንን የኋላ ክፍል መረጋጋት ተጠቅሞ በመቐለ ላይ ጫና በመፍጠር ሦስት ነጥቡን ይዞ ለመውጣት ሰፊ ዕድል አለው። ዛሬ ቡድኑ ከደረጃው አንጻር የሚጠበቅበትን የበላይነት ካሳየ የዋንጫ ግስጋሴውን ይበልጥ የሚያሳልጥበት ውጤት ያስመዘግባል።
መቐለ 70 እንደርታዎች ፍፁም ዓለሙ፣ አብዲ ዋበላ እና ተመስገን ተስፋዬን በቅጣት ምክንያት አያሰልፉም። በሲዳማ ቡና በኩል ደግሞ ሐብታሙ ታደሰ በጉዳት ምክንያት አይኖርም።
ቡድኖቹ እስካሁን ባደረጓቸው 7 ጨዋታዎች መቐለ 70 እንደርታዎች ሦስት ጊዜ ድል ሲያደርጉ ሲዳማ ቡናዎች ሁለት ጊዜ ማሸነፍ ችለዋል ፤ በሁለት ጨዋታዎች ደግሞ አቻ ተለያይተዋል። በግንኙነታቸው ከተቆጠሩት 12 ጎሎች መቐለ ሰባት ሲያስቆጥር ሲዳማ አምስቱን አስቆጥሯል።