የሲቢኢ የኢትዮጵያ ፕሪሚየር ሊግ 33ኛ ሳምንት ጨዋታዎች ዛሬ ጅማሯቸውን ሲያደርጉ ጨዋታዎቹን የተመለከቱ መረጃዎችንም እንደሚከተለው አሰናድተንላችኋል።
ኢትዮጵያ መድን ከ ወላይታ ዲቻ
ኢትዮጵያ መድን እስካሁን ባደረጋቸው 32 ጨዋታዎች 41 ነጥብ በመሰብሰብና +3 የጎል ክፍያ በመያዝ በ10ኛ ደረጃ ላይ ይገኛል። ቡድኑ ካለፉት አምስት ጨዋታዎች በሦስቱ አሸንፎ በሁለቱ አቻ በመውጣት በአስደናቂ ወቅታዊ አቋም ላይ ይገኛል። በተለይም ባለፈው ሳምንት ከመቐለ 70 እንደርታ ጋር 1 ለ 1 በሆነ አቻ ውጤት ከመለያየቱ በፊት ንግድ ባንክንና ሲዳማ ቡናን ያሸነፈበት ታክቲካዊ ብስለት የቡድኑ ዋነኛ ጥንካሬ ሆኗል። የመድኖቹ ጥንካሬ በጨዋታዎች ላይ የሚያሳዩት ግብ የማግኘት ጽናት እና ውጤት የማስጠበቅ ብቃት ሲሆን ደካማ ጎኑ ደግሞ በተወሰኑ ጨዋታዎች ላይ የሚታይባቸው የትኩረት ማጣት ነው። ዛሬም ይህንን ያለመሸነፍ ጉዞ ለማስቀጠል ሙሉ ጥንካሬውን ይዞ ይገባል ተብሎ ይጠበቃል።
በተቃራኒው የጦና ንቦቹ ወላይታ ዲቻ በደረጃ ሰንጠረዡ ከመድን በአንድ ደረጃ ከፍ ብለው በ42 ነጥብ እና +3 የጎል ክፍያ 9ኛ ደረጃ ላይ ተቀምጠዋል። የዲቻ ያለፉት አምስት ጨዋታዎች አቋም እጅግ አስፈሪነታቸውን የሚያሳይ ሲሆን ባለፈው ሳምንት ከቅዱስ ጊዮርጊስ ጋር 0 ለ 0 በሆነ አቻ ውጤት ተለያይተው ነጥብ ተጋርተዋል። የቡድኑ ትልቁ ጥንካሬ 32 ጎሎችን ያስቆጠረውና በማጥቃት መስመር ላይ የሚፈጥረው ከፍተኛ ጫና ነው። ይሁን እንጂ 29 ጎሎችን ያስተናገደው የኋላ ክፍላቸው በተለይም በመልሶ ማጥቃት ለሚመጡ ኳሶች በቀላሉ መጋለጡ እንደ ደካማ ጎን የሚነሳ ሲሆን ዛሬ ይህንን ክፍተት አርመው የሚገቡ ከሆነ ለተጋጣሚያቸው ከባድ ፈተና ሊሆኑ ይችላሉ።
ኢትዮጵያ መድን እና ወላይታ ድቻ ከዚህ ቀደም 9 ጊዜ ተገናኝተዋል፤ እኩል 3 ጊዜ ድል ሲያደርጉ በ 3 አቻ ተለያይተዋል። ወላይታ ድቻ 11፣ መድን 9 ግቦች በግንኙነታቸው አስቆጥረዋል።
በኢትዮጵያ መድን በኩል በረከት ካሌብና ቤንጃሚን ኮቴ በጉዳት ከዛሬው ጨዋታ ውጪ ናቸው። በወላይታ ድቻ በኩል ኬኔዲ ከበደ በቅጣት ምክንያት አይኖርም።
ባህር ዳር ከተማ ከ መቻል
የጣና ሞገዶቹ እስካሁን ባደረጓቸው 32 ጨዋታዎች 44 ነጥብ በመያዝ እና +3 የጎል ክፍያ በ7ኛ ደረጃ ላይ ይገኛሉ። ቡድኑ ባለፉት አምስት የውድድር ሳምንታት ወጥ ያልሆነ ጉዞ ያሳየ ሲሆን ባለፈው የጨዋታ ሳምንት ድሬዳዋ ከተማን 2 ለ 0 በሆነ ውጤት መርታቱ ለዛሬው ፍልሚያ ትልቅ የመንፈስ ስንቅ ሆኖታል። የባህር ዳሮች ዋነኛ መለያ በ32 ጨዋታዎች 22 ጎል ብቻ ያስተናገደው የብረት ግድግዳ የተከላካይ ክፍላቸው ቢሆንም በአንጻሩ 25 ጎል ብቻ ያስቆጠረው የማጥቃት መስመራቸው እና ድልን በአቻ ውጤት የመለወጥ ልማዳቸው (እስካሁን 17 አቻ) እንደ ደካማ ጎን ይነሳል። ዛሬም ይህንን የተከላካይ ጥንካሬ ይዘው የማጥቃት ስልታቸው ጋር ካጣመሩ ለጦሩ ከባድ አደጋ መፍጠራቸው አይቀሬ ነው።
በሊጉ የክብር ሰገነት ላይ በ52 ነጥብ እና +18 የጎል ክፍያ 2ኛ ደረጃ ላይ የሚገኘው መቻል በአሁኑ ወቅት እጅግ አስፈሪ ብቃት ላይ ይገኛል። ጦሩ ለመጨረሻ ጊዜ ሽንፈት ካስተናገደ በኋላ ለ12 ተከታታይ ጨዋታዎች (ወደ 80 ለሚጠጉ ቀናት) ሙሉ በሙሉ ያለመሸነፍ አስደናቂ ግርማ ሞገስን ገንብቷል። ካለፉት አምስት ጨዋታዎች ባሳየው አቋም እና ባለፈው ሳምንት ተፎካካሪው ነገሌ አርሲን 4 ለ 0 በሆነ ሰፊ የጎል እሩምታ ድል ባደረገበት ወኔ ዛሬም ወደ ሜዳ ይገባል። የመቻሎች ትልቁ ጥንካሬ 41 ጎሎችን ያስቆጠረው ከፍተኛ የማጥቃት አቅማቸው ሲሆን ደካማ ጎን ተብሎ የሚነሳው ግን አልፎ አልፎ በመሃል ሜዳ ላይ የሚታይባቸው የኳስ ቁጥጥር መላላት ነው። ዛሬም ይህንን የ80 ቀናት ያለመሸነፍ ታሪክ ይዘው የባህር ዳርን የብረት ግድግዳ ሰብረው የሊጉን መሪነት ለማጥበቅ ጨዋታቸውን ያደርጋሉ።
ሁለቱ ቡድኖች 11 ጊዜ ተገናኝተው ባህር ዳሮች 4 ጨዋታዎችን ድል ሲያደርጉ፤ መቻሎች 3 ጨዋታዎችን አሸንፈው በተቀሩቶ 4 ጨዋታዎች በአቻ ውጤት ተጠናቀዋል። ቡድኖቹም እኩል 11 ግቦችን አስቆጥረዋል።
ባህር ዳር ከተማ ማንያዘዋል ካሳ፣ ሰቲህ ኦሴ እና ወንድሜነህ ደረጀን በጉዳት ዛሬ አይገኝም።
ሀዲያ ሆሳዕና ከ ኢትዮጵያ ንግድ ባንክ
የ33ኛ ሳምንት ተጠባቂ ጨዋታ ውስጥ አንዱ የሆነው እና በደረጃ ሰንጠረዡ እምብርት ላይ እኩል 41 ነጥብ ይዘው የተቀመጡትን ሁለቱን ክለቦች ያገናኛል። በ10ኛ ደረጃ ላይ የሚገኘው ሀዲያ ሆሳዕና ዋነኛ ታክቲካዊ ጥንካሬው ከመከላከል ወደ ማጥቃት በፍጥነት የሚደረግ የሽግግር ጨዋታ ሲሆን ባለፉት አምስት ጨዋታዎች ያስመዘገበው ተከታታይ የነጥብ ጉዞ እና ባለፈው ሳምንት ሲዳማ ቡናን 1 ለ 0 ያሸነፈበት የአደረጃጀት ብስለት ለዛሬው ጨዋታ ትልቅ እምነት ሰጥቶታል። ይሁን እንጂ ጨዋታዎችን መሪ ሆኖ በሚጀምርበት ወቅት የጨዋታውን ፍጥነት የመቆጣጠር እና በመጨረሻዎቹ ደቂቃዎች የሚታይበት የትኩረት ማጣት እንደ ዋነኛ ድክመት ይነሳል።
በተቃራኒው በጎል ክፍያ ተበልጦ በ11ኛ ደረጃ ላይ የተቀመጠው ኢትዮጵያ ንግድ ባንክ በመስመር አጥቂዎቹ አማካኝነት በተጋጣሚ ሳጥን ዙሪያ የቁጥር ብልጫ መፍጠር መቻሉ እና ባለፈው ሳምንት ሸገር ከተማን 2 ለ 1 ያሸነፈበት ወኔ ትልቁ ጥንካሬው ነው። ነገር ግን የተከላካይ ክፍሉን ወደ ፊት አስጠግቶ በሚጫወትበት ወቅት ከተከላካዮች ጀርባ የሚቀረው ሰፊ ክፍት ቦታ ለፈጣን አጥቂዎች ምቹ መሆኑ ትልቅ ክፍተት ፈጥሮበታል። ዛሬም ይህንን በመልሶ ማጥቃት በቀላሉ የመጋለጥ ድክመቱን በመቅረፍ የሆሳዕናን ፈጣን ሽግግር ለመግታት የሚያደርገው ፍልሚያ ጨዋታውን እጅግ ማራኪ ያደርገዋል።
ቡድኖቹ በሊጉ 7 ጊዜ ተገናኝተው ኢትዮጵያ ንግድ ባንክ 3 አሸንፎ 4 ጎሎችን ማስቆጠር የቻለ ሲሆን ሀድያ ሆሳዕናም 2 ድልና 2 ግብ አስመዝግቦ በተቀሩት ሁለት ጨዋታዎች ነጥብ ተጋርተዋል።
ሁለቱም ቡድኖች ከቅጣትም ሆነ ከጉዳት ነጻ የሆነ ስብሰባቸውን ይዘው ይቀርባሉ።