በካፍ ቻምፒዮንስ ሊግ ሲዳማ ቡና የሚገጥመው የንጃሜናው ክለብ ማነው?
በ2018 ውድድር ዓመት በታሪኩ ለመጀመርያ ጊዜ የኢትዮጵያ ፕሪምየር ሊግን በማሸነፍ በታላቁ አህጉራዊ ውድድር ለመሳተፍ የበቃው ሲዳማ ቡና በመጀመርያው የማጣርያ ጨዋታ የቻዱን ኤግሎንስ ኤፍሲ ይገጥማል።
ኤግሎንስ እግር ኳስ ክለብ ማነው?
በግሪጎርያን አቆጣጠር በ2015 ከቻድ ዋና ከተማ ንጃሜና የተቋቋመው ኤግሎንስ ኤፍሲ ሰማያዊ እና ነጭ ዋና መለያ ቀለማቱ ሲሆኑ መደበኛ ጨዋታዎቹንም በፓሪስ ኮንጎ ስታዲየም ያደርጋል። የመጀመሪያዎቹን ዓመታት የሀገር ውስጥ ወጣት ተሰጥኦዎችን በማውጣት እና በንጃሜና ክልላዊ ሊጎች ሲፎካከር የቆየው ክለቡ፣ በቻድ እግር ኳስ ፌዴሬሽን የአስተዳደር ችግር፣ የገንዘብ እጥረት እና በፊፋ እገዳዎች ምክንያት ብሔራዊ ሊጉ ተቋርጦ በነበረበት ወቅት በአካባቢያዊ ውድድሮች በመሳተፍ ተጫዋቾቹን ሲያዘጋጅ ቆይቷል።
በ2025/26 የውድድር ዘመን የቻድ እግር ኳስ ፌዴሬሽን አዲስ መዋቅር ዘርግቶ ባለ 12 ቡድን ብሔራዊ ሊግ (Ligue 1) ካቋቋመ በኋላ፣ ኤግሎንስ በ22 ጨዋታዎች 18ቱን አሸንፎ፣ በ4ቱ አቻ በመውጣት በ58 ነጥብ ያለምንም ሽንፈት የመጀመሪያውን የቻድ ፕሪሚየር ሊግ ዋንጫ በማንሳት ታሪካዊ ስኬት አስመዝግቧል።
የአህጉራዊ ውድድር ስኬት?
በ2025/26 የውድድር ዘመን የቻድ ብሔራዊ ሊግ እንደ አዲስ ከተቋቋመ በኋላ የመጀመሪያውን የቻድ ፕሪሚየር ሊግ ዋንጫ በማንሳት ታሪካዊ ስኬት በማስመዝገቡ በታሪኩ ለመጀመሪያ ጊዜ የካፍ ቻምፒዮንስ ሊግ ውድድር ላይ ለመሳተፍ በቅቷል።
የክለቡ አሰልጣኝ ማነው?
የኤግሎንስ አሰልጣኝ የቻድ ዜግነት ያላቸው ዋና አሰልጣኝ አማን አዱም ቱኒያ ናቸው። የሀገር ውስጥ አሰልጣኝ መሆናቸውና የቻድን እግር ኳስ ባህል ጠንቅቀው ማወቃቸው ክለቡን ወደ ስኬት ለመምራት የረዳቸው ሲሆን፣ የተመጣጠነ እና የተደራጀ መከላከልን ከፈጣን የመስመር ማጥቃት (Counter-attack) ጋር ያቀናጀ ታክቲክ በመጠቀም ቡድናቸው በሊጉ 72 ጎሎችን አስቆጥሮ 7 ጎል ብቻ ማስተናገዳቸው ጠንካራ የመከላከል አጨዋወት እንደሚያዘውትሩ ማሳያ ነው።
የክለቡ ወሳኝ ተጫዋች?
በክለቡ ውስጥ ኮከብ ግብ ጠባቂው ቢርዌ ማንጋና የመሳሰሉ ቁልፍ ተጫዋቾች ቢኖሩም ከሁሉም የላቀ አበርክቶ ያለው የክለቡ ኮከብ የመስመር አጥቂ ፋቢየን ጄዳኑም የቡድኑ ወሳኝ ተጫዋች ነው። በ2025/26 የውድድር ዘመን ክለቡ 72 ጎሎችን አስቆጥሮ የሊጉ ሻምፒዮን እንዲሆን ባደረገው ከፍተኛ አበርክቶ የሊጉ ኮከብ ተጫዋች ተብሎ መጠራቱ የቡድኑ ቁልፍ ተጫዋች ያደርገዋል።
ክለቡ የሚጫወትበት ስታዲየም?
የክለቡ ዋና ሜዳ ፓሪስ ኮንጎ ሙኒሲፓል ስታዲየም ሲሆን ለልምምድ እና ለሀገር ውስጥ መደበኛ ጨዋታዎች በብዛት ይጠቀማል። ይሁን እንጂ እንደ ካፍ ቻምፒዮንስ ሊግ ያሉ ትላልቅ አህጉራዊና ዓለም አቀፍ ጨዋታዎችን ሲያደርግ ስታድ ኦሊምፒክ ማርሻል ኢድሪስ ዴቢ ኢትኖ ማንጃፋ በተባለ አካባቢ የሚገኝና በቅርቡ የተመረቀ የቻድ ዘመናዊ ስታዲየም እና ስታድ ኢድሪስ ማሃማት ኡያ የ30 ሺህ ተመልካች የመያዝ አቅም ያለውና በቅርቡ እድሳት የተደረገለት ስታዲየም ሲሆን የ2026 የቻድ ሊግ ሻምፒዮንነቱን ያረጋገጠበት ታሪካዊ ሜዳው ነው። ከሀገራችን ተወካይ ከሲዳማ ቡና ጋር ማጣሪያ ጨዋታ ቅዳሜ ነሐሴ 30 ቀን 2018 ዓ.ም. ማንጃፋ በተባለ አካባቢ በሚገኘው ስታድ ኦሊምፒክ ማርሻል ኢድሪስ ዴቢ ኢትኖ የሚደረግ ሲሆን የመልሱ ጨዋታ ደግሞ መስከረም 3 ካፍ ለውድድሩ በፈቀደው ድሬዳዋ ስታዲየም የሚደረግ ይሆናል።